جنوبی افریقہ کے خلاف دوسرے ٹی20 سے بیون جیکبز باہر ہوئے، کور کے طور پر کٹینے کلارک شامل

ہیملٹن، 17 مارچ (ہ س)۔ نیوزی لینڈ کرکٹ ٹیم کو جنوبی افریقہ کے خلاف دوسرے ٹی20 مقابلے سے پہلے بڑا جھٹکا لگا ہے۔ مڈل آرڈر بلے باز بیون جیکبز گھٹنے کی چوٹ کی وجہ سے اس میچ سے باہر ہو گئے ہیں۔ ان کی جگہ ان کیپڈ کھلاڑی کٹینے کلارک کو ٹیم میں کور کے طور پر شامل کیا گیا ہے۔

23 سالہ جیکبز کو پہلا ٹی20 کھیلتے ہوئے مانٹ مانگانوئی میں فیلڈنگ کے دوران بائیں گھٹنے میں چوٹ لگ گئی تھی، جس کے بعد انہیں میدان چھوڑنا پڑا۔ اسکین میں ان کے گھٹنے کے کنارے ’بون بروزنگ‘ (ہڈی میں چوٹ) کی تصدیق ہوئی ہے۔ نیوزی لینڈ کرکٹ بورڈ نے بتایا کہ ان کی واپسی کے حوالے سے مزید جانچ کی جائے گی۔

وہیں 26 سالہ کٹینے کلارک حال ہی میں ناردرن ڈسٹرکٹس کی سپر اسمیش خطابی جیت میں شاندار فارم میں نظر آئے تھے۔ انہوں نے ٹورنامنٹ میں 9 اننگز میں 431 رن بنائے، جس میں ایک سنچری اور تین نصف سنچریاں شامل ہیں۔ ان کا اوسط 61.57 اور اسٹرائیک ریٹ 171.71 رہا۔

نیوزی لینڈ اور جنوبی افریقہ کے درمیان دوسرا ٹی20 مقابلہ منگل، 17 مارچ کو ہیملٹن میں کھیلا جائے گا۔ پہلے میچ میں جنوبی افریقہ نے سات وکٹوں سے جیت درج کر کے سیریز میں برتری حاصل کر لی ہے۔

ہندوستھان سماچار

---------------

ہندوستان سماچار / انظر حسن