جموں، 14 مارچ (ہ س)۔ جموں و کشمیر کے ضلع سانبہ کے سرحدی علاقوں میں پاکستانی ڈرون کی مشتبہ نقل و حرکت کے بعد سیکورٹی فورسز نے ہفتہ کے روز بڑے پیمانے پر تلاشی مہم شروع کر دی۔ حکام کے مطابق ڈرون جمعہ کی رات دیر گئے رام گڑھ سیکٹر کے سرحدی دیہات کندرال، ابتال اور بہادرپور کے اوپر چند منٹ تک دیکھا گیا۔
اطلاعات کے مطابق ڈرون کی سرگرمی نظر آنے کے فوراً بعد علاقے کو سخت نگرانی میں لے لیا گیا، جبکہ ہفتہ کی صبح سویرے سیکورٹی فورسز نے یہ یقینی بنانے کے لیے سرچ آپریشن شروع کیا کہ کہیں سرحد پار سے اسلحہ یا منشیات کی کھیپ تو نہیں گرائی گئی۔
ادھر گزشتہ دو دنوں کے دوران آر ایس پورہ سیکٹر کے سرحدی علاقوں میں ڈرون کے ذریعے گرائی گئی منشیات کی بڑی کھیپ بھی برآمد کی گئی ہے۔ سیکورٹی فورسز نے 3.5 کلوگرام سے زائد ہیروئن ضبط کی، جس کی عالمی منڈی میں قیمت 20 کروڑ روپے سے زیادہ بتائی جا رہی ہے۔
حکام نے بتایا کہ آر ایس پورہ سیکٹر میں تازہ برآمدگی کے سلسلے میں دو مشتبہ منشیات اسمگلروں کو بھی حراست میں لے کر ان سے پوچھ گچھ کی جا رہی ہے۔
ہندوستھان سماچار
---------------
ہندوستان سماچار / محمد اصغر
