نئی دہلی، 13 مارچ (ہ س)۔ دہلی کانگریس نے آج ملک بھر میں ایل پی جی سلنڈر کی قلت کو لے کر بھارتیہ جنتا پارٹی (بی جے پی) کے دفتر پر احتجاج کیا۔ دہلی پردیش کانگریس کے صدر دیویندر یادو کی قیادت میں پارٹی کارکنوں نے بی جے پی کے دفتر کے سامنے مٹی کے چولہے پر کھانا پکایا اور چائے بنائی ۔ تاہم پولیس نے احتجاج کرنے والے کانگریسی کارکنوں کو پکڑ کر بسوں میں ڈالا اور پولیس اسٹیشن لے گئی۔

دیویندر یادو نے سوشل میڈیا پر پوسٹ کرتے ہوئے کہا کہ اچھے دن بہت دور ہیں، کیونکہ ہم مٹی کے چولہے پر کھانا پکانے پر مجبور ہیں۔ ملک کو ایل پی جی کی شدید قلت کا سامنا ہے۔ انہوں نے کہا کہ وزیر اعظم نے ہندوستان کے توانائی کے تحفظ پر سمجھوتہ کر کے ہم وطنوں کو قطاروں میں کھڑا کر دیا ہے۔ ہم عوام کو اس’خارجہ پالیسی‘ کا خمیازہ بھگتنے نہیں دیں گے۔

دیویندر یادو نے کہا کہ حکومت نے عوام کی آواز کو دبانے کے لیے ہمیں گرفتار کیا ہے۔ لیکن ہم گرفتاریوں سے نہیں ڈرتے! ملک ایل پی جی کے لیے لائنوں میں کھڑا ہے، کھانا اب مٹی کے چولہے پر پک رہا ہے، اور وزیراعظم کہتے ہیں یہ امرت کال چل رہا ہے!

ہندوستھا ن سماچار

ہندوستان سماچار / محمد شہزاد