لاتور ، 13 مارچ (ہ س)۔ لاتور۔نلنگا شاہراہ پر چلبُرگا پاٹی کے قریب گؤرکشا کارکنوں نے کارروائی کرتے ہوئے ایک کنٹینر سے 14 بیلوں کو بچا لیا جو مبینہ طور پر غیر قانونی طور پر ذبح خانے لے جائے جا رہے تھے۔ بعد ازاں یہ بیل اور کنٹینر کِلاری پولیس کے حوالے کر دیے گئے۔اطلاعات کے مطابق جاولی، عمرگا اور لاتور کے گورکشا کارکنوں کو اطلاع ملی تھی کہ شاہراہ کے ذریعے بیلوں کی غیر قانونی نقل و حمل کی جا رہی ہے۔ اس اطلاع کے بعد کارکنوں نے ایک کنٹینر کو روک کر اس کی جانچ کی تو اس کے اندر 14 بیل بند حالت میں پائے گئے۔ کارکنوں کو شبہ ہوا کہ ان جانوروں کو ذبح کے لیے بیدر لے جایا جا رہا ہے۔ واقعہ کی اطلاع فوراً 112 ہیلپ لائن کے ذریعے پولیس کو دی گئی۔اس کے بعد کِلاری پولیس اسٹیشن کے اسسٹنٹ پولیس انسپکٹر ڈاکٹر وشال شہانے کی ہدایت پر پولیس ٹیم کو موقع پر روانہ کیا گیا۔ پولیس ڈرائیور دھم پال لونڈھے اور پولیس حوالدار پنڈھریناتھ سومونشی وہاں پہنچے اور کنٹینر کو اپنے قبضے میں لے کر پولیس اسٹیشن منتقل کر دیا۔ اس معاملے میں بَلی گووند مولے (رہائشی جاولی، تعلقہ اوسا) کی شکایت پر پانچ ملزمان کے خلاف مقدمہ درج کیا گیا ہے۔ ملزمان میں یللاپا شہاناپا (ڈرائیور)، وینکٹ لکشمن بوئی (مددگار)، مجیب قریشی، منا قریشی اور توشین قریشی شامل ہیں جو اوسا علاقے کے رہائشی بتائے گئے ہیں۔پولیس کے مطابق کارروائی کے دوران 14 بیل جن کی قیمت تقریباً 3 لاکھ 2 ہزار روپے ہے اور ایک کنٹینر جس کی مالیت تقریباً 10 لاکھ روپے ہے ضبط کیا گیا ہے۔ اس طرح مجموعی طور پر 13 لاکھ 2 ہزار روپے مالیت کا سامان پولیس نے قبضے میں لیا ہے۔ پولیس حکام کے مطابق ضبط کیے گئے بیلوں کو رِنگنی (تعلقہ اوسا) کے گورکشن مرکز کے حوالے کرنے کی کارروائی کی جا رہی ہے۔

ہندوستھان سماچار

--------------------

ہندوستان سماچار / جاوید این اے