ممبئی ، 12 مارچ (ہ س) مہاراشٹر کے نائب وزیر اعلیٰ ایکناتھ شندے نے کہا ہے کہ ریاست کو عالمی سطح پر ترقی یافتہ بنانے کے لیے بنیادی ڈھانچے، صنعتی سرمایہ کاری اور ہاؤسنگ کے شعبوں میں وسیع پیمانے پر منصوبے جاری ہیں۔ ان کے مطابق مہاراشٹر نہ صرف ملک کی معاشی طاقت ہے بلکہ قومی ترقی کو آگے بڑھانے میں کلیدی کردار ادا کر رہا ہے۔وہ ممبئی میں آئیڈیک ممبئی اور ہاؤسنگ محکمہ کی جانب سے منعقدہ ‘آئیڈیا ایکسپو 2026’ کے افتتاحی پروگرام سے خطاب کر رہے تھے۔ یہ نمائش بنیادی ڈھانچے اور تعمیراتی شعبے کی اہم سرگرمیوں میں شمار کی جاتی ہے۔

ایکناتھ شندے نے کہا کہ ممبئی آنے والے تمام مہمانوں کا مہاراشٹر میں دل سے استقبال ہے۔ ان کے مطابق آئیڈیا ایکسپو ایک ایسا پلیٹ فارم ہے جہاں نئی ٹیکنالوجی، جدید خیالات اور مستقبل کی ترقی کے منصوبوں پر سنجیدہ گفتگو ہوتی ہے۔انہوں نے بتایا کہ یہ اس نمائش کا ساتواں ایڈیشن ہے اور اس تین روزہ پروگرام میں 15 سے 20 ہزار شرکاء کی شرکت متوقع ہے۔ اس موقع پر معمار، تعمیراتی ماہرین، شہری منصوبہ ساز، صنعت کار، پالیسی ساز اور ماحولیات کے ماہرین پائیدار ترقی کے مختلف پہلوؤں پر تبادلہ خیال کریں گے۔

انہوں نے مزید کہا کہ حالیہ ریاستی بجٹ دراصل 2047 کے وژن ‘بلڈنگ مہاراشٹر، بلڈنگ انڈیا’ کا خاکہ پیش کرتا ہے اور اس وژن کے ذریعے ریاست کو عالمی اقتصادی نقشے پر مزید مضبوط مقام دلانے کی کوشش کی جا رہی ہے۔شندے نے بتایا کہ ریاستی وزیر پنکج بھویار کے خصوصی اصرار پر وہ بجٹ اجلاس کی مصروفیات کے باوجود اس پروگرام میں شریک ہوئے۔

انہوں نے کہا کہ ممبئی اپنی عالمی حیثیت کی وجہ سے بین الاقوامی کانفرنسوں اور نمائشوں کا اہم مرکز بن چکا ہے۔ انہوں نے مثال دیتے ہوئے کہا کہ حال ہی میں یہاں ورلڈ آڈیو ویژول انٹرٹینمنٹ سمٹ منعقد ہوئی تھی جس میں وزیر اعظم نریندر مودی نے بھی شرکت کی تھی

ہندوستھان سماچار

--------------------

ہندوستان سماچار / جاوید این اے