ممبئی ، 12 مارچ (ہ س) مہاراشٹر کے وزیر جنگلات گنیش نائک نے جمعرات کو اسمبلی میں کہا کہ ریاستی حکومت بلڈھانہ ضلع کی لونار جھیل سے پانی نکالنے کے لیے جلد ہی محکمہ جنگلی حیات سے منظوری حاصل کرے گی۔ جھیل میں پانی کی سطح بڑھنے کے باعث کئی قدیم مندر زیرِ آب آ گئے ہیں اور عقیدت مندوں کے لیے ان تک پہنچنا مشکل ہو گیا ہے۔

وزیر جنگلات گنیش نائک اسمبلی میں رکن اسمبلی سدھارتھ خرات کے توجہ دلاؤ نوٹس کا جواب دے رہے تھے۔ انہوں نے بتایا کہ محکمہ جنگلی حیات سے ضروری منظوری حاصل کرنے کے لیے جمعہ کو ایک اہم اجلاس بلایا گیا ہے جس میں اس معاملے پر فیصلہ کیا جائے گا۔

نائک نے کہا کہ لونار جھیل کا پانی اس وقت گلابی رنگ اختیار کر چکا ہے اور اس میں نمکینیت بھی پائی جاتی ہے۔ ریاستی حکومت جھیل کی صورتحال پر مسلسل نظر رکھے ہوئے ہے۔

انہوں نے بتایا کہ اس سال بھاری بارش کے باعث کریٹر جھیل کے اطراف کئی قدرتی چشمے پھوٹ پڑے ہیں جس کے نتیجے میں جھیل کے پانی کی سطح تقریباً 20 سے 25 فٹ تک بڑھ گئی ہے۔ اس وجہ سے عقیدت مند قریبی مندروں تک نہیں پہنچ پا رہے ہیں۔

وزیر جنگلات نے کہا کہ اس مسئلے کے حل کے لیے جلد ہی ڈویژنل کمشنر، ضلع کلکٹر اور دیگر متعلقہ حکام سے بات چیت کی جائے گی تاکہ پانی کو پمپ کے ذریعے جلد سے جلد جھیل سے باہر نکالا جا سکے۔

انہوں نے مزید بتایا کہ اس علاقے میں ترقیاتی کاموں کے لیے 434 کروڑ روپے کی منظوری دی گئی ہے جن میں سے 168 کروڑ روپے خرچ بھی کیے جا چکے ہیں۔

رکن اسمبلی سدھارتھ خرات نے توجہ دلاؤ نوٹس پیش کرتے ہوئے کہا تھا کہ جھیل سے پانی نکالنے کے لیے 41 لاکھ روپے کی منظوری دی جا چکی ہے، لیکن محکمہ جنگلی حیات اور محکمہ آثارِ قدیمہ کے درمیان تال میل نہ ہونے کی وجہ سے کام رکا ہوا ہے۔

ہندوستھان سماچار

--------------------

ہندوستان سماچار / جاوید این اے