نئی دہلی، 10 مارچ (ہ س): بورڈ آف کنٹرول فار کرکٹ ان انڈیا (بی سی سی آئی) نے ٹی 20 ورلڈ کپ جیتنے والی ٹیم انڈیا کے لیے 131 کروڑ روپے کی ریکارڈ انعامی رقم کا اعلان کیا ہے۔ یہ رقم کسی بھی ٹی20 ورلڈ کپ جیتنے پر بی سی سی آئی کی طرف سے دی جانے والی اب تک کی سب سے بڑی انعامی رقم ہے۔
اس سے قبل، جب ہندوستانی ٹیم نے 2024 میں بارباڈوس میں روہت شرما کی کپتانی میں ٹی 20 ورلڈ کپ جیتا تھا، بی سی سی آئی نے 125 کروڑ روپے کی انعامی رقم کا اعلان کیا تھا۔ اس بار سوریہ کمار یادو کی کپتانی میں ٹیم انڈیا نے ٹائٹل کا کامیابی سے دفاع کرتے ہوئے تاریخ رقم کی جس کے بعد بورڈ نے اس سے بھی بڑی رقم کی پیشکش کرنے کا فیصلہ کیا۔
بی سی سی آئی نے ایک سرکاری بیان میں کہا کہ ہندوستانی ٹیم کو آئی سی سی مردوں کے ٹی20 ورلڈ کپ 2026 میں شاندار کارکردگی اور ٹائٹل جیتنے پر 131 کروڑ روپے کی انعامی رقم ملے گی۔ احمد آباد کے نریندر مودی اسٹیڈیم میں ہندوستان نے فائنل میں نیوزی لینڈ کو شکست دے کر ٹرافی جیتی۔
اس جیت کے ساتھ ہی ہندوستانی ٹیم نے لگاتار دوسرا ٹی20 ورلڈ کپ ٹائٹل جیت لیا، وہ ٹورنامنٹ کی تاریخ میں ایسا کرنے والی پہلی ٹیم بن گئی۔ ہندوستان اس محدود اوورز کے فارمیٹ میں اپنی مضبوط پوزیشن کو مزید مستحکم کرتے ہوئے تین بار ٹی20 ورلڈ کپ جیتنے والی پہلی ٹیم بھی بن گئی۔
بی سی سی آئی نے اس تاریخی کامیابی پر کھلاڑیوں، معاون عملے اور سلیکٹرز کو مبارکباد دی اور مستقبل میں بھی اسی طرح کی شاندار کارکردگی کی خواہش کی۔
---------------
ہندوستان سماچار / عبدالسلام صدیقی
