بھوپال، 10 مارچ (ہ س)۔ مدھیہ پردیش کانگریس کمیٹی کے صدر جیتو پٹواری نے وجے پور اسمبلی سے کانگریس لیڈر مکیش ملہوترا کے انتخاب کو کالعدم قرار دیے جانے کے معاملے میں بی جے پی پر سنگین الزامات لگائے ہیں۔ انہوں نے کہا کہ یہ معاملہ بی جے پی کی خرید و فروخت کی سیاست اور اس کے ’’چال، چرتر اور چہرہ‘‘ کو بے نقاب کرتا ہے۔

جیتو پٹواری نے منگل کو صحافیوں سے گفتگو کرتے ہوئے کہا کہ بی جے پی یہ سوال اٹھا رہی ہے کہ وجے پور سے ایک قبائلی رکن اسمبلی اسمبلی کیسے پہنچ گیا۔ انہوں نے کہا کہ بی جے پی لیڈروں کے ذریعے قبائلی لیڈر حزبِ اختلاف کی ’’اوقات‘‘ پوچھنا ان کی قبائلی مخالف ذہنیت کی عکاسی کرتا ہے۔ یہی سلوک وجے پور کے ہمارے لیڈر مکیش ملہوترا کے ساتھ کیا گیا ہے۔

پٹواری نے اعلان کیا کہ مکیش ملہوترا کے انتخاب کو کالعدم قرار دینے کے فیصلے کے خلاف کانگریس سپریم کورٹ جائے گی۔ اس معاملے میں سینئر وکیل اور راجیہ سبھا ممبر وویک تنکھا سپریم کورٹ میں کانگریس کی جانب سے پیروی کریں گے۔ انہوں نے کہا کہ کانگریس کو عدلیہ پر پورا بھروسہ ہے اور انہیں یقین ہے کہ انصاف ملے گا نیز مکیش ملہوترا پھر سے عوام کی حمایت سے منتخب ہو کر آئیں گے۔

پی سی سی چیف پٹواری نے بی جے پی کے قبائلی ارکانِ پارلیمنٹ، ارکانِ اسمبلی اور بوتھ سطح کے کارکنوں سے سوال کرتے ہوئے کہا کہ وہ بتائیں کہ کیا اس طرح کا قدم درست ہے۔ انہوں نے الزام لگایا کہ بی جے پی کی سوچ نے قبائلی سماج کی توہین کی ہے اور مسلسل ان کے حقوق پر حملے ہو رہے ہیں۔

کانگریس کے ریاستی صدر نے کہا کہ بی جے پی حکومت کو بڑھتی ہوئی مہنگائی نظر نہیں آتی، لیکن اسے یہ ضرور نظر آتا ہے کہ ایک قبائلی رکن اسمبلی اسمبلی کیسے پہنچ گیا۔ انہوں نے الزام لگایا کہ ریاست میں حکومت کی لاپرواہی کی وجہ سے اندور میں 35 بچوں کی موت ہوئی اور چھندواڑہ میں زہریلی شراب سے لوگوں کی جان گئی، لیکن حکومت ان واقعات کو لے کر سنجیدہ نہیں ہے۔

پٹواری نے الزام لگایا کہ بھوپال میں واقع ولبھ بھون دلالوں کا اڈہ بن گیا ہے، جہاں عام لوگوں کے کام بچولیوں کے بغیر نہیں ہوتے۔ انہوں نے کہا کہ ریاست کا تعلیمی نظام بھی بدحال ہے اور کئی یونیورسٹیاں ڈگری بیچنے والے ادارے بنتی جا رہی ہیں۔

انہوں نے رکن اسمبلی نرملا سپرے کے معاملے کا ذکر کرتے ہوئے کہا کہ بی جے پی حکومت لوگوں کو ایک عدالت سے دوسری عدالت تک گمراہ کر رہی ہے۔ اگر بی جے پی میں ہمت ہے تو نرملا سپرے کا دوبارہ انتخاب کرا کے دکھائے۔ پٹواری نے کہا کہ ریاست میں کسانوں کے مفادات کو نظر انداز کیا جا رہا ہے اور حکومت کی پالیسیاں کسان مخالف ہیں۔ انہوں نے الزام لگایا کہ وزیراعلیٰ موہن یادو کی قیادت میں ریاست پر قرض کا بوجھ مسلسل بڑھ رہا ہے۔

انہوں نے کہا کہ حکومت لاڈلی بہنا یوجنا میں بہنوں سے کیے گئے 3 ہزار روپے دینے کے وعدے کو بھی پورا نہیں کر پائی ہے۔ پٹواری نے دعویٰ کیا کہ ریاست کی معاشی صورتحال مسلسل کمزور ہو رہی ہے اور عام جنتا حکومت کی پالیسیوں سے پریشان ہے۔ انہوں نے اعتماد ظاہر کیا کہ آنے والے وقت میں ریاست میں کانگریس کی حکومت بنے گی اور ریاست کو قرض کے بوجھ سے آزاد کر کے ترقی کی نئی سمت دی جائے گی۔

ہندوستھان سماچار

---------------

ہندوستان سماچار / انظر حسن