کولہاپور ، 10 مارچ (ہ س)۔ مہاراشٹر کے کولہاپور ضلع میں اینٹی کرپشن بیورو (اے سی بی) نے کارروائی کرتے ہوئے سات لاکھ روپے رشوت مانگنے کے الزام میں دو پولیس اہلکاروں کو گرفتار کر لیا ہے۔ یہ واقعہ ضلع کے کر ویر علاقے میں پیش آیا۔ اے سی بی حکام کے مطابق گرفتار اہلکاروں میں ہیڈ کانسٹیبل نتیش ماروتی کامبلے اور کانسٹیبل اعجاز محمد شیخ شامل ہیں، جو گوکُل–شرگاؤں پولیس اسٹیشن میں خدمات انجام دے رہے تھے۔الزام ہے کہ دونوں اہلکاروں نے ایک شخص سے اس کے خلاف دھوکہ دہی کا مقدمہ درج نہ کرنے کے بدلے سات لاکھ روپے طلب کیے تھے۔ متاثرہ شخص نے اس مطالبے کی اطلاع اینٹی کرپشن بیورو کو دی، جس کے بعد اے سی بی ٹیم نے کارروائی کا منصوبہ بنایا۔ شکایت کنندہ کے ذریعے دونوں اہلکاروں کو کر ویر کے ایک مقام پر رقم وصول کرنے کے لیے بلایا گیا۔جیسے ہی دونوں اہلکار وہاں رشوت لینے کے لیے پہنچے، اے سی بی کی ٹیم نے فوری کارروائی کرتے ہوئے انہیں رنگے ہاتھوں گرفتار کر لیا۔ اس معاملے میں مزید تفتیش جاری ہے۔ہندوستھان سماچار

ہندوستان سماچار / جاوید این اے