ممبئی، یکم مارچ (ہ س)۔ سابق نائب وزیر اعلیٰ اجیت پوار کے طیارہ حادثے سے متعلق جاری ابتدائی تحقیقاتی رپورٹ پر اعتراض کرتے ہوئے این سی پی (ایس پی) کے ایم ایل اے روہت پوار نے اعلان کیا ہے کہ وہ پیر کو ممبئی میں اس معاملے پر نئی تفصیلات سامنے لائیں گے۔ ان کا کہنا ہے کہ رپورٹ کے بعض مندرجات تشویش پیدا کرتے ہیں جن پر وضاحت ضروری ہے۔ایئرکرافٹ ایکسیڈنٹ انویسٹیگیشن ڈپارٹمنٹ نے ہفتہ کو 22 صفحات پر مشتمل جو ابتدائی رپورٹ جمع کی، اس میں حادثے سے قبل کے آخری لمحات کی تکنیکی معلومات شامل ہیں۔ اس کے مطابق طیارہ زمین پر گرنے سے پہلے ایک درخت سے ٹکرایا تھا جبکہ حادثے کے وقت علاقے میں حدِ نگاہ کم تھی۔رپورٹ میں یہ بھی درج ہے کہ طیارے اور بارامتی ایئر ٹریفک کنٹرول کے درمیان صبح 8:29:25 سے 8:46:13 تک مسلسل رابطہ رہا۔ آخری لمحات میں پائلٹ کی جانب سے “او شیٹ، او شیٹ” کا پیغام دیا گیا لیکن کنٹرول روم سے کوئی ردعمل نہیں ملا۔روہت پوار نے خاص طور پر رپورٹ کے صفحہ نمبر 4 پر درج اس جغرافیائی حوالہ پر سوال اٹھایا ہے جس میں بارامتی ایئر فیلڈ کو مہاراشٹر کے بارامتی ضلع میں واقع بتایا گیا ہے۔ ان کے مطابق ایسی بنیادی غلطی اس بات کا ثبوت ہے کہ رپورٹ کس حد تک سنجیدگی سے تیار کی گئی ہے اور اسی دستاویز کی بنیاد پر سی آئی ڈی کی تفتیش کس طرح آگے بڑھے گی۔انہوں نے کہا کہ وہ ان تمام نکات پر تفصیل سے بات کریں گے کیونکہ وہ شروع سے ہی اس حادثے کے بارے میں شبہ ظاہر کرتے رہے ہیں۔ہندوستھان سماچار

ہندوستان سماچار / جاوید این اے