نئی دہلی، یکم مارچ (ہ س): وزیر اعظم نریندر مودی نے اتوار کو کہا کہ مرکزی حکومت سکھوں کے لئے احترام اور انصاف کو یقینی بنانے کے لئے پرعزم ہے۔

وزیر اعظم نے آج نئی ممبئی میں شری گرو تیغ بہادر جی کی 350ویں یومِ شہادت کے موقع پر ویڈیو پیغام کے ذریعے خطاب کیا۔ جو بولے سو نہال، ست سری اکال کے نعرے سے اپنے خطاب کا آغاز کرتے ہوئے انہوں نے کہا کہ آج ہر کوئی ہندوستان کے شری گرو تیغ بہادر جی کی 350ویں یومِ شہادت کو یاد کر رہا ہے۔

انہوں نے کہا کہ ہندوستان کی تاریخ بہادری، ہم آہنگی اور تعاون کی رہی ہے اور مہاراشٹر کی سرزمین پر منعقد ہونے والی یہ تقریب اس عظیم وراثت کی گواہی دیتی ہے۔ ان کے مطابق، سماج کے ہر طبقے نے گروجی سے تحریک لے کر سچائی اور ثقافت کے لیے ثابت قدم رہنا سیکھا ہے۔

سکھ وراثت کو عزت دینے کے بارے میں، انہوں نے کہا کہ مرکزی حکومت قومی سطح پر گرو صاحبان سے متعلق تاریخی مواقع کو منا رہی ہے، جس میں 400 ویں پرکاش پرو، یادگاری ڈاک ٹکٹوں اور خصوصی سکوں کا اجرا اور گرو نانک دیو جی کے 550 ویں پرکاش پرو کا جشن شامل ہے۔

وزیر اعظم نے کہا کہ حکومت نے ویر بال دیوس شروع کیا، کرتارپور صاحب کوریڈور کی تعمیر ریکارڈ وقت میں مکمل کی، ہیم کنڈ صاحب یاترا کے لیے سہولیات میں اضافہ کیا اور سکھ اداروں کو مختلف سطحوں پر ریلیف فراہم کیا۔

انہوں نے 1984 کے فسادات کی تحقیقات کے لیے ایس آئی ٹی کی تشکیل، مقدمات کو دوبارہ کھولنے، متاثرین کو اضافی معاوضہ دینے اور قومی اقلیتی کمیشن کو فعال کرنے کا بھی ذکر کیا۔

انہوں نے کہا کہ حکومت نے افغانستان میں سکھوں کی حفاظت کے سوال پر مشن موڈ میں کام کیا، گرو گرنتھ صاحب کی کاپیاں احترام کے ساتھ واپس لائیں اور شہریت ترمیمی قانون کے ذریعے ستائے ہوئے سکھ پناہ گزینوں کو ریلیف فراہم کیا۔

انہوں نے وضاحت کی کہ یہ اجتماع ایک مسلسل سفر ہے، جس کا آغاز گزشتہ سال ناگپور سے ہوا، پھر تخت سری حضور صاحب تک پھیل گیا، اور اب نوی ممبئی میں ایک اہم سنگ میل تک پہنچ گیا۔ انہوں نے ریاستی حکومت کو یاترا کے پیغام کو مہاراشٹر کے ہزاروں دیہاتوں تک پہنچانے پر مبارکباد دی۔

---------------

ہندوستان سماچار / عبدالسلام صدیقی