اسلام آباد، یکم مارچ (ہ س)۔ اتوار کی صبح ایران پر اسرائیل اور امریکہ کے مشترکہ حملے میں ایران کے سپریم لیڈر آیت اللہ علی خامنہ ای کی ہلاکت کی خبر نے پاکستان کے مختلف علاقوں میں لوگوں کو مشتعل کر دیا ہے۔ کراچی میں امریکی قونصلیٹ کے باہر ہزاروں مظاہرین جمع ہوئے اور نعرے بازی کی۔ جھڑپ کے بعد امریکی سیکیورٹی اہلکاروں نے فائرنگ کردی جس کے نتیجے میں 9 افراد ہلاک اور 18 زخمی ہوگئے۔ زخمیوں کو مختلف اسپتالوں میں داخل کرایا گیا ہے۔ وزیر داخلہ سندھ نے واقعے کی پولیس سے رپورٹ طلب کرلی ہے۔

زی ٹی وی نے سرکاری اسپتال کے حکام کے حوالے سے اطلاع دی ہے کہ آج سہ پہر کراچی میں امریکی قونصل خانے کے باہر امریکی اور اسرائیلی حملوں کے خلاف احتجاج کرنے والے مظاہرین اور پولیس کے درمیان جھڑپوں میں کم از کم نو افراد ہلاک اور 18 زخمی ہو گئے۔ اسپتال کے حکام نے اس کی تصدیق کی ہے۔

اسلام آباد میں امریکی سفارت خانے نے سوشل میڈیا پلیٹ فارمز پر ایک بیان جاری کرتے ہوئے اپنے شہریوں سے چوکس رہنے کی اپیل کی ہے۔ اس میں کہا گیا ہے، ہم کراچی اور لاہور میں امریکی قونصل خانوں کے باہر جاری مظاہروں کی رپورٹس کی نگرانی کر رہے ہیں، ساتھ ہی اسلام آباد میں امریکی سفارت خانے اور پشاور میں قونصل خانے کے باہر مظاہروں کی کال بھی دی گئی ہے۔ پاکستان میں رہنے والے امریکی شہریوں کو مشورہ دیا جاتا ہے کہ وہ مقامی خبروں کی نگرانی کریں اور احتیاط کے ساتھ ذاتی حفاظت کی اچھی احتیاطی تدابیر اختیار کریں اور ہجوم والی جگہوں سے گریز کریں۔

اس سے قبل پرتشدد مظاہرین نے امریکہ اور اسرائیل پر مشرق وسطیٰ میں عدم استحکام کو ہوا دینے کا الزام لگایا تھا۔ مظاہرین نے نعرے لگاتے ہوئے رکاوٹیں توڑ دیں۔ ہجوم نے امریکی علامتوں کو نشانہ بنایا اور سفارت خانے کے احاطے کے ایک حصے کو آگ لگا دی۔

ایدھی ایمبولینس سروس کے مطابق ابتدائی طور پر 6 لاشوں اور 10 زخمیوں کو ایم ٹی خان روڈ سے سول اسپتال کراچی لے جایا گیا۔ اسپتال کے ٹراما سینٹر کے حکام نے بعد میں تصدیق کی کہ 18 زخمیوں کے ساتھ سات لاشیں اسپتال لائی گئیں۔ اسپتال حکام کا کہنا ہے کہ زخمی افراد فائرنگ، لاٹھی چارج اور بھگدڑ سے زخمی ہوئے۔

سول اسپتال کراچی کے ٹراما سینٹر کے سربراہ ڈاکٹر صابر میمن کے مطابق اسپتال میں اب تک 8 لاشیں لائی جا چکی ہیں، جب کہ 20 زخمیوں کو طبی امداد دی جا رہی ہے۔ ایک اور شدید زخمی بعد میں دم توڑ گیا۔

امریکی قونصل خانے کے باہر جمع ہونے والے مظاہرین نے پتھراو¿ کیا، اور آگے بڑھنے کی کوشش کی، جس کے بعد سیکورٹی اہلکاروں نے ہجوم کو منتشر کرنے کے لیے طاقت کا استعمال کیا، جس کے بعد فائرنگ کی گئی۔

سندھ کے وزیر داخلہ ضیا الحسن لنجر نے ایڈیشنل انسپکٹر جنرل پولیس کراچی سے واقعے کی رپورٹ طلب کرلی ہے۔ ایک بیان میں انہوں نے کہا کہ کسی کو قانون اپنے ہاتھ میں لینے کی اجازت نہیں دی جائے گی۔ لنجر نے صوبے بھر میں حساس مقامات پر سیکورٹی بڑھانے کا حکم دیا۔

---------------

ہندوستان سماچار / عبدالسلام صدیقی