بیروت،03فروری(ہ س)۔لبنان کے چینل ’الجدید‘ کے مطابق پیر کے روز ایک اسرائیلی ڈرون نے جنوبی لبنان میں صیدا شہر کے قریب شاہراہ پر حزب اللہ کی گاڑی کو نشانہ بنایا۔ ڈرون سے دو میزائل داغے جانے کے نتیجے میں گاڑی تباہ ہوگئی اور حزب اللہ کا ایک رکن ہلاک ہو گیا۔ اس سے قبل جنوبی لبنان میں ہی زہرانی-صور ہائی وے پر فینیشیا یونیورسٹی کے قریب بھی ایک گاڑی کو نشانہ بنایا گیا تھا۔اس کے علاوہ پیر کی صبح اسرائیلی فوج نے عیتا الشعب کے قصبے میں ایک مکان کو دھماکے سے اڑا دیا اور اسی قصبے پر صوتی بم بھی گرائے۔ بعد ازاں عین قانا اور کفر تبنیت کے قصبوں پر فضائی حملے کیے گئے، جہاں اسرائیلی فوج نے حزب اللہ کے اسلحہ خانوں کو نشانہ بنانے کا دعویٰ کیا۔ اتوار کو بھی ڈرون حملوں میں حزب اللہ کے دو ارکان ہلاک ہوئے تھے۔نومبر 2024 میں طے پانے والے جنگ بندی معاہدے کے باوجود اسرائیل نے لبنان پر حملوں کا سلسلہ بند نہیں کیا ہے۔ معاہدے کے تحت اسرائیلی افواج کا مکمل انخلاءہونا تھا، لیکن اسرائیل نے جنوبی لبنان کی 5 اہم پہاڑیوں پر اپنا قبضہ برقرار رکھا ہوا ہے۔ اسرائیل کا موقف ہے کہ وہ حزب اللہ کو اپنی فوجی صلاحیتیں دوبارہ بحال کرنے کی اجازت نہیں دے گا اور ان کے اسلحہ خانوں کو نشانہ بناتا رہے گا۔
دوسری جانب لبنانی حکومت نے حزب اللہ کا اسلحہ جمع کرنے کے لیے 5 مراحل پر مشتمل ایک منصوبہ تیار کیا ہے۔ لبنانی فوج نے جنوری کے آغاز میں پہلے مرحلے (دریائے لیطانی کے جنوبی علاقے) کی تکمیل کا اعلان کیا تھا، تاہم اسرائیل نے اسے ناکافی قرار دیا۔ اب دوسرے مرحلے میں دریائے لیطانی کے شمال سے صیدا کے قریب دریائے اولی تک کے علاقے میں کارروائی ہونی ہے۔واضح رہے کہ 27 نومبر 2024 سے نافذ العمل معاہدے کی مسلسل خلاف ورزی کی جا رہی ہے۔ اسرائیلی فوج جنوبی لبنان میں تقریباً روزانہ کی بنیاد پر بمباری اور زمین دوز کرنے کی کارروائیاں کر رہی ہے، جس کے نتیجے میں اب تک سیکڑوں عام شہری جاں بحق اور زخمی ہو چکے ہیں۔
ہندوستھان سماچار
ہندوستان سماچار / Mohammad Khan
