چنئی، 24 فروری (ہ س) وزیر اعظم نریندر مودی اور مرکزی وزیر داخلہ امت شاہ نے تمل ناڈو کی آنجہانی سابق وزیر اعلیٰ جے جے للیتا کو ان کی 78 ویں یوم پیدائش پر خراج عقیدت پیش کیا۔ وزیراعظم نے تمل زبان میں تعزیتی پیغام جاری کیا۔

وزیر اعظم مودی نے اپنے 'ایکس' (سابقہ ٹویٹر) پیج پر لکھا کہ جے للیتا ایک کرشماتی رہنما اور ایک بہترین منتظم تھیں۔ ان کی زندگی عزم اور اٹوٹ قوت ارادی سے بھری ہوئی تھی۔ وزیراعلیٰ کے طور پر، انہوں نے تمل ناڈو میں خواتین کو بااختیار بنانے، سماجی انصاف اور جامع فلاحی اسکیموں کے ذریعے بہترین حکمرانی فراہم کی۔ وزیر اعظم نے کہا کہ ہمدردی اور مضبوطی ان کی شخصیت کی خصوصیات ہیں اور وہ ان کے ساتھ اپنی گفتگو کو شوق سے یاد کرتے ہیں۔

وزیر اعظم نے یہ بھی شیئر کیا کہ انہوں نے اس مہینے کے 'من کی بات' پروگرام میں جے للتا کا ذکر کیا تھا اور اس کا ویڈیو بھی شیئر کیا گیا تھا۔

اپنے پیغام میں مرکزی وزیر داخلہ امت شاہ نے کہا کہ غریبوں کی فلاح و بہبود اور خواتین کے حقوق کے لیے جے للیتا کی کوششوں نے تمل ناڈو کی ترقی کو ایک نئی سمت دی۔ انہوں نے کہا کہ ان کی حکومت کے فوائد معاشرے کے آخری فرد تک پہنچے اور عوامی زندگی کے لیے ان کی لگن ہمیشہ متاثر کن رہے گی۔

وزیر اعظم نے پہلے اپنے من کی بات پروگرام میں کہا تھا کہ جو لوگ معاشرے اور عوام کی بھلائی کے لیے کام کرتے ہیں وہ ہمیشہ لوگوں کے دلوں میں زندہ رہتے ہیں۔ انہوں نے ماو¿ں اور خواتین کی بہبود کے لیے جے للیتا کی اسکیموں اور امن و امان کو برقرار رکھنے کے لیے ان کی کوششوں کی تعریف کی۔ مودی نے کہا کہ ان کے ساتھ ہر ملاقات اور بات چیت ان کے ذہن میں ابھی بھی تازہ ہے، اور یہ کہ ان کی واضح سوچ ان کی پہچان تھی۔

---------------

ہندوستان سماچار / عبدالسلام صدیقی