۔ بھارتی بحریہ کے لیے 16 ہفتوں کی سخت تربیت مکمل کرنے والا اب تک کا سب سے بڑا بیچ

نئی دہلی، 09 نومبر (ہ س)۔ بھارتی بحریہ کے لیے تیار کیے گئے اگنی ویروں کا اب تک کا سب سے بڑا بیچ 13 نومبر کو تربیت مکمل کرکے پاس آؤٹ ہوگا۔ آئی این ایس چلکا سے پاس آؤٹ ہونے والے اس دستے میں تقریباً 3300 اگنی ویر شامل ہیں، جو 16 ہفتوں کی سخت تربیت مکمل کرنے کے بعد بحریہ کا حصہ بنیں گے۔ بھارتی بحریہ اور انڈین کوسٹ گارڈ کے اس نویں دستے کی پاسنگ آؤٹ پریڈ منعقد کی جائے گی۔ آئی این ایس چلکا سے تربیت مکمل کرکے نکلنے والا یہ اب تک کا سب سے بڑا دستہ ہوگا، جو ایک مضبوط، نوجوان اور ہر طرح کے حالات کا مقابلہ کرنے کے لیے تیار بحریہ تشکیل دینے کی سمت ایک اہم کامیابی ہے۔

بھارتی بحریہ کے سب سے بڑے تربیتی مرکز آئی این ایس چلکا میں ہونے والی پاسنگ آؤٹ پریڈ کے مہمان خصوصی بحریہ کے سربراہ ایڈمرل کرشنا سوامی ناتھن ہوں گے اور وہ پریڈ کا معائنہ بھی کریں گے۔ یہ پریڈ 3300 سے زائد تربیت یافتہ جوانوں کی 16 ہفتوں کی تربیت کی کامیاب تکمیل کی علامت ہوگی۔ اس طرح یہ آئی این ایس چِلکا سے پاس آؤٹ ہونے والا اب تک کا سب سے بڑا بیچ بن جائے گا۔ اس تربیت کا مقصد نوجوان بھرتی ہونے والے جوانوں کو نظم و ضبط کا پابند، جسمانی طور پر چاق و چوبند، ذہنی طور پر مضبوط اور پیشہ ورانہ صلاحیتوں سے لیس بحری اہلکار بنانا ہے۔

تربیت کے دوران تعلیمی سرگرمیوں، جسمانی مشقوں، تیراکی، پریڈ کی تربیت، بیرونی سرگرمیوں اور کیمپوں کو شامل کیا گیا ہے، جو تربیت حاصل کرنے والوں کے پیشہ ورانہ سفر کے لیے مضبوط بنیاد فراہم کرتے ہیں۔ کردار سازی، قیادت کی صلاحیت، نظم و ضبط، بھائی چارے اور ٹیم ورک پر بھی یکساں توجہ دی جاتی ہے۔ اس کے ساتھ ہی بحریہ کی مخصوص اقدار، یعنی فرض شناسی، عزت اور حوصلے کی تعلیم بھی دی جاتی ہے۔ پاسنگ آؤٹ پریڈ تربیت حاصل کرنے والے جوانوں کے لیے فخر اور کامیابی کا لمحہ ہوگی، کیونکہ اس موقع پر ان کے اہل خانہ تربیت کے سفر کی تکمیل اور ایک نئے پیشہ ورانہ سفر کے آغاز کے گواہ بنیں گے۔ اس کے علاوہ بحریہ کے سابق اہلکار اور خصوصی مہمان بھی اس موقع پر موجود رہیں گے۔

اس تقریب کی صدارت بحریہ کی جنوبی کمانڈ کے فلیگ آفیسر کمانڈنگ ان چیف وائس ایڈمرل سمیر سکسینہ کریں گے۔ نمایاں کارکردگی کا مظاہرہ کرنے والے تربیت یافتہ جوانوں، چیمپئن ڈویژن اور بہترین انسٹرکٹر کو ان کی عمدہ کارکردگی اور تربیت میں تعاون کے لیے اعزازات سے نوازا جائے گا۔ تقریب میں تربیت حاصل کرنے والوں کے دو لسانی رسالے ’انکور‘ کی رونمائی بھی کی جائے گی۔ پاسنگ آؤٹ پریڈ کی براہ راست نشریات بحریہ کے سرکاری سوشل میڈیا پلیٹ فارم پر کی جائیں گی، تاکہ ملک بھر کے لوگ اس تقریب کا مشاہدہ کر سکیں۔

ہندوستھان سماچار

ہندوستھان سماچار / محمد شہزاد