نئی دہلی، 7 نومبر (ہ س):۔

ریلوے وزیر اشونی ویشنو نے ہفتہ کے روز آنند وہار ریلوے اسٹیشن کا معائنہ کیا اور مسافروں سے بات چیت کرکے ان کے سفری تجربات اور ریلوے کی جانب سے فراہم کی جانے والی سہولیات کے بارے میں معلومات حاصل کیں۔

معائنے کے دوران ویشنو نے نوجوانوں، خواتین اور بچوں سے ملاقات کی۔ انہوں نے مسافروں سے ریلوے کی مختلف سہولیات اور خدمات کے بارے میں ان کی رائے معلوم کی۔ اس دوران کئی مسافروں نے ریلوے میں مسلسل ہورہی بہتری اور جدید تبدیلیوں کے لیے ریلوے وزیر کا شکریہ ادا کیا۔

ریلوے وزیر نے نوجوانوں کی حوصلہ افزائی کی اور بچوں سے ہاتھ ملاکر ان کا استقبال کیا۔ مسافروں کے ساتھ اس بات چیت کا مقصد ریلوے کے انتظامات کے حوالے سے ان کی اطمینان کی سطح اور زمینی سطح پر دستیاب سہولیات کے اثرات کا جائزہ لینا تھا۔

اس دوران ویشنو اسٹیشن پر عام مسافروں کے درمیان انتہائی سادہ انداز میں نظر آئے۔ انہوں نے اسٹیشن کے احاطے میں چائے کی ایک دکان پر رک کر چائے پی اور یو پی آئی کے ذریعے ڈیجیٹل ادائیگی بھی کی۔

ہندوستھان سماچار

ہندوستھان سماچار / عطاءاللہ