مونگیر اور بھاگلپور کے درمیان 83 کلو میٹر طویل میرین ڈرائیو کی تعمیر شروع ہوگی، ایک کروڑ افراد کو سرکاری ملازمت اور روزگار سے جوڑنے کا عزم

پٹنہ، 7 نومبر (ہ س)۔ بہار کے وزیر اعلیٰ سمراٹ چودھری نے ہفتہ کی شام ضلع مونگیر کے بریارپور بلاک کے کلیان پور واقع شری شری 108 بڑی درگا مہارانی مندر احاطے میں دیوالی کی آمد سے قبل شمع روشن کرکے عظیم الشان دیپوتسو پروگرام کا افتتاح کیا۔ اس موقع پر انہوں نے کہا کہ وزیر اعظم نریندر مودی ملک کو ترقی یافتہ بنانے کے لیے مسلسل ترقیاتی کاموں میں مصروف ہیں۔ سابق وزیر اعلیٰ نتیش کمار نے بھی بہار کو خوشحال بنانے کی سمت میں اہم اقدامات کیے ہیں۔ موجودہ حکومت ان کے شروع کردہ ترقیاتی منصوبوں کو آگے بڑھا رہی ہے۔

وزیر اعلیٰ نے گنگاندی میں آنے والے سیلاب اور اس سے کسانوں کی فصلوں کو ہونے والے نقصانات کا ذکر کرتے ہوئے کہا کہ دسہرہ کے موقع پر نیپال کے ترائی علاقے اور سون ندی سے آنے والا پانی گنگا میں شامل ہوا، جس کے نتیجے میں کئی علاقوں میں سیلاب کی صورتحال پیدا ہوگئی۔ گنگا کے پانی کا مناسب انتظام اور بہتر استعمال کسانوں کے مفاد میں انتہائی ضروری ہے۔ اسی مقصد کے تحت 2 نومبر کو مرکزی وزیر برائے سڑک ٹرانسپورٹ و شاہراہ نتن گڈکری کے ساتھ ایک اہم معاہدہ کیا گیا ہے۔ گنگا سے گاد نکالنے اور پانی کے بہتر انتظام کے ذریعے دستیاب وسائل کا بھرپور استعمال کیا جائے گا۔

انہوں نے کہا کہ گنگا کے پانی کو آبپاشی کے کام میں لایا جائے گا۔ اس کے لیے مختلف مقامات پر ڈیم اور آبی ڈھانچے تعمیر کرکے پانی کو کھیتوں تک پہنچانے کا منصوبہ ہے۔ اس سے کسانوں کو فصلوں کی آبپاشی کے لیے وافر پانی دستیاب ہوگا اور ان کی خوشحالی میں اضافہ ہوگا۔

وزیر اعلیٰ نے اعلان کیا کہ مونگیر اور بھاگلپور کے درمیان تقریباً 83 کلو میٹر طویل میرین ڈرائیو کی تعمیر شروع کی جائے گی۔ اس منصوبے سے علاقے میں آمدورفت کی سہولت بہتر ہوگی اور ترقی کے نئے امکانات پیدا ہوں گے۔

سمراٹ چودھری نے کہا کہ مونگیر کی سرزمین سے تعلق رکھنے والے انہیں وزیر اعظم کی دعاؤں اور آشیرواد سے بہار کی خدمت کرنے کا موقع ملا ہے۔ انہوں نے یقین دلایا کہ ریاست میں صنعتوں کے فروغ اور روزگار کی فراہمی کے لیے تیزی سے کام کیا جا رہا ہے۔ حکومت کا ہدف ہے کہ 2030 سے پہلے بہار میں روزگار کے ایسے وافر مواقع پیدا کیے جائیں، تاکہ ریاست کے کسی بھی شخص کو مجبوری میں مزدوری کے لیے دوسری ریاستوں کا رخ نہ کرنا پڑے۔ بہتر ملازمت، کاروبار اور روزگار کے مواقع بہار میں ہی فراہم کیے جائیں گے۔

انہوں نے مزید کہا کہ ریاستی حکومت نے ایک کروڑ لوگوں کو سرکاری ملازمت اور روزگار سے جوڑنے کا ہدف مقرر کیا ہے، جسے پورا کرنے کے لیے تیزی سے اقدامات کیے جا رہے ہیں۔ آئندہ پانچ برسوں میں ایک کروڑ خاندانوں کو کاروباری اور صنعت کار بنانے کا بھی ہدف رکھا گیا ہے۔ بہار میں صنعتوں کی توسیع ہوگی، سرمایہ کاری میں اضافہ ہوگا اور نوجوانوں کے لیے روزگار کے نئے مواقع پیدا کیے جائیں گے۔

وزیر اعلیٰ نے ماں لکشمی، بھگوان شری رام، ماں درگا اور ماں سرسوتی سے بہار کی مسلسل ترقی، خوشحالی اور ریاست کے ہر خاندان کی بہتری کے لیے دعا کی۔ انہوں نے کلیان پور میں عظیم الشان اور تاریخی دیپوتسو کے انعقاد پر یوتھ کلب، معروف ہومیوپیتھک معالج ڈاکٹر نتیش چندر دوبے اور مقامی باشندوں کو مبارکباد پیش کی۔ اس کے ساتھ ہی ریاست کے تمام باشندوں کو دیوالی کی دلی مبارکباد بھی دی۔

ہندوستھان سماچار

ہندوستھان سماچار / Mohammad Afzal Hassan