بیونس آئرس، 7 نومبر (ہ س)۔ ارجنٹینا میں تقریباً 39 سال بعد پوپ کی آمد کو لے کر تیاریاں زور و شور سے جاری ہیں۔ چودہویں پوپ لیو 8 سے 11 نومبر تک ارجنٹینا کے دورے پر رہیں گے۔ اس دوران وہ کئی دعائیہ اجتماعات اور مذہبی تقریبات میں شرکت کریں گے۔ دورے کے پہلے دن وہ ارجنٹینا کے صدر خاویر میلی سے بھی ملاقات کریں گے۔ پوپ کی حفاظت کے پیش نظر انتظامیہ نے سخت حفاظتی ضوابط نافذ کیے ہیں۔
مقامی باشندوں کے مطابق تقریبات میں شرکت کرنے والوں کی شناخت کی جانچ کی جائے گی۔ سکیورٹی وجوہات کی بنا پر دھات کے چاقو، کانٹے، لائٹر اور آتش گیر اشیا لے جانے پر پابندی ہوگی۔ پروگرام کے مقام پر صرف پلاسٹک کے چمچ اور کانٹے لے جانے کی اجازت ہوگی۔ اس کے علاوہ 20 سینٹی میٹر سے زیادہ لمبی سیلفی اسٹک بھی ممنوع قرار دی گئی ہے۔ خلاف ورزی کرنے والوں کی ممنوعہ اشیا ضبط کرلی جائیں گی۔
انتظامیہ نے تقریبات میں شرکت کے لیے خصوصی اجازت نامہ لازمی قرار دیا ہے۔ شہر میں گاڑیوں کی آمدورفت پر بھی پابندیاں لگائی جائیں گی، جس کے باعث عقیدت مندوں کو کئی کلومیٹر پیدل چلنا پڑ سکتا ہے۔
چودہویں پوپ لیو کے دورے کے پیش نظر بیونس آئرس کو لوجان اور دیگر اہم شہروں سے جوڑنے والی شاہراہ کے تقریباً 50 کلومیٹر طویل حصے کو 15 گھنٹے سے زیادہ وقت تک بند رکھنے کا منصوبہ ہے۔ اسی راستے سے پوپ تقریب کے مقام تک پہنچیں گے۔
اس کے علاوہ ہوائی اڈوں پر بھی حفاظتی پابندیاں نافذ رہیں گی اور ایئرلائنز کو پوپ کے دورے کے شیڈول کے مطابق پروازوں کے اوقات میں تبدیلی کی ہدایات دی جائیں گی۔
ہندوستھان سماچار
---------------
ہندوستھان سماچار / عبدالواحد
