دہرادون، 6 نومبر (ہ س)۔ مرکزی وزیر داخلہ امیت شاہ کی جمعہ کو دہرادون آمد کے موقع پر کانگریس اور اتراکھنڈ کرانتی دل نے الگ الگ مسائل کو لے کر احتجاج کیا۔ کانگریس کے ریاستی صدر گنیش گودیال نے بازو پر کالی پٹی باندھ کر احتجاج درج کرایا، جب کہ اتراکھنڈ کرانتی دل کے کارکنوں نے مستقل باشندوں کے حقوق، زمین سے متعلق قانون اور غیرسین کو مستقل راجدھانی بنانے کے مطالبے پر مظاہرہ کیا۔

گنیش گودیال نے میڈیا سے بات چیت میں ریاست کی نظم و نسق کی صورت حال، خواتین کی سلامتی، بے روزگاری، بھرتی امتحانات میں مبینہ بے ضابطگیوں اور بدعنوانی کے مسائل اٹھائے۔ انہوں نے انکیتا بھنڈاری قتل معاملے کا ذکر کرتے ہوئے کہا کہ ریاست کے عوام اس معاملے میں انصاف اور اس سے جڑے سوالات کے غیر جانبدارانہ اور شفاف حل کا مطالبہ کر رہے ہیں۔

انہوں نے دھن تیرس کے دن امت شاہ کی ریلی منعقد کیے جانے پر بھی سوال اٹھایا۔ گودیال نے کہا کہ بی جے پی سے وابستہ تنظیموں نے یکم نومبر کو دہلی میں راہل گاندھی کی ریلی کا انعقاد تہوار کے دوران ہونے کی بنیاد پر مخالفت کی تھی۔

وہیں، اتراکھنڈ کرانتی دل کے کارکنوں نے مرکزی وزیر داخلہ کی آمد پر احتجاج کرتے ہوئے مرکز اور ریاستی حکومت سے ریاست کے بنیادی مسائل پر جواب طلب کیا۔ پارٹی کے مرکزی کارگزار صدر جے پرکاش اپادھیائے نے کہا کہ ریاست کے قیام کے 26 سال بعد بھی اتراکھنڈ بے روزگاری، نقل مکانی اور تعلیم و صحت کے مسائل سے دوچار ہے۔ انہوں نے سوال کیا کہ اب تک مضبوط مقامی باشندوں سے متعلق قانون اور زمین سے متعلق قانون نافذ کرنے کے ساتھ ساتھ غیرسین کو مستقل راجدھانی بنانے کی سمت میں ٹھوس فیصلہ کیوں نہیں کیا گیا۔

یوکراند کے مرکزی جنرل سکریٹری راجندر سنگھ بشٹ نے مقامی لوگوں کے لیے زمین، روزگار اور قدرتی وسائل پر حقوق یقینی بنانے کا مطالبہ کیا۔ انہوں نے خواتین کی سلامتی، انکیتا بھنڈاری قتل معاملے میں انصاف، تعلیم اور صحت کے نظام میں بہتری اور آفات سے متاثرہ افراد کی مستقل بازآبادکاری کا مسئلہ بھی اٹھایا۔

پارٹی کے میٹروپولیٹن صدر پروین رومولا نے کہا کہ ریاست میں غیر منصوبہ بند ترقی، بے روزگاری، مہنگائی، آلودگی اور پینے کے پانی کا بحران جیسے مسائل برقرار ہیں۔ اتراکھنڈ کرانتی دل نے مقامی باشندوں سے متعلق قانون اور مضبوط زمین قانون نافذ کرنے، غیرسین کو مستقل راجدھانی قرار دینے اور پانی، جنگلات اور زمین پر مقامی عوام کے حقوق یقینی بنانے کا مطالبہ کیا۔

ہندوستھان سماچار

ہندوستھان سماچار / محمد شہزاد