نئی دہلی، 6 نومبر (ہ س): ۔

دہلی ہائی کورٹ نے جمعہ کو ایک اہم تبصرہ کرتے ہوئے نئی دہلی میونسپل کونسل (این ڈی ایم سی) کو سخت پھٹکار لگائی ہے۔ عدالت نے واضح کیا کہ جب کوئی جائیداد متعلقہ قوانین کے تحت قانونی اور باقاعدہ نوٹیفائیڈ جائیداد ہو تو مناسب قانونی کارروائی اور پیشگی نوٹس دیے بغیر اس کی بجلی اور پانی جیسی بنیادی سہولیات منقطع نہیں کی جا سکتیں۔

جسٹس سبرامنیم پرساد کی سربراہی والی بنچ نے یہ تبصرہ ریس کورس مسجد کے امام محمد ہارون کی جانب سے دائر نئی اپیل پر سماعت کے دوران کیا۔ اس سے قبل سنگل بنچ نے مسجد کی بجلی اور پانی کی سپلائی بحال کرنے سے متعلق عرضی مسترد کر دی تھی، جسے اب اس اپیل کے ذریعے چیلنج کیا گیا ہے۔

عدالت نے نوٹس جاری کرتے ہوئے این ڈی ایم سی اور دہلی وقف بورڈ کو دو ہفتوں کے اندر جواب داخل کرنے کی ہدایت دی ہے۔ عدالت اب اس معاملے کی اگلی سماعت 14 دسمبر کو کرے گی۔

یہ تنازع وزیر اعظم کی رہائش گاہ (7، لوک کلیان مارگ) کے قریب تقریباً 53 ایکڑ پر پھیلے ریس کورس کلب کے احاطے میں واقع تاریخی مسجد سے متعلق ہے، جسے دہلی وقف بورڈ کے تحت نوٹیفائیڈ جائیداد قرار دیا گیا ہے۔

درخواست گزار کے مطابق 7 اکتوبر کو بغیر کسی پیشگی اطلاع کے اس احاطے کی بجلی اور پانی کی سپلائی اچانک بند کر دی گئی تھی۔ اس کے علاوہ سکیورٹی وجوہات کا حوالہ دیتے ہوئے مسجد میں نماز ادا کرنے کی اجازت پر بھی پابندی عائد ہے۔

مسلم فریق کو یہ خدشہ تھا کہ انتظامیہ اس تاریخی مسجد کو ہٹانے یا منہدم کرنے کی کارروائی کر سکتی ہے۔

تاہم، اس معاملے میں مرکزی حکومت کے لینڈ اینڈ ڈیولپمنٹ آفس (ایل اینڈ ڈی او) نے 29 اکتوبر کو سماعت کے دوران ہائی کورٹ کو بتایا تھا کہ دہلی وقف بورڈ کی عرضداشت پر فیصلہ کرنے میں تقریباً چار ہفتے لگیں گے اور اس وقت تک مسجد کو ہٹانے یا منہدم کرنے کی کوئی کارروائی نہیں کی جائے گی۔

ہندوستھان سماچار

ہندوستھان سماچار / عطاءاللہ