جموں, 04 نومبر (ہ س): ریاسی پولیس نے منشیات کے خلاف کارروائی کرتے ہوئے کٹرا کے سرلی علاقے میں دو افراد کو گرفتار کرکے ان کے قبضے سے 17.4 گرام ہیروئن، 26 ہزار 640 روپے نقد اور دیگر مشتبہ سامان برآمد کیا ہے۔
پولیس کے مطابق گزشتہ شب پولیس تھانہ کٹرا کی ایک ٹیم معمول کی گشت اور ناکہ چیکنگ کے دوران سرلی کے مقام پر موجود تھی، جہاں ایک مشتبہ سوئفٹ کار کو روک کر تلاشی لی گئی۔ تلاشی کے دوران گاڑی سے ہیروئن کے علاوہ ایک چھوٹا ترازو اور ایلومینیم فوائل پیپر بھی برآمد ہوا۔
گرفتار افراد کی شناخت فرمان علی ولد نذیر محمد سکنہ جنکھا، تحصیل دانسل، ضلع جموں اور شبینہ بی بی دختر محمد شفیع سکنہ بٹھنڈی، جموں کے طور پر ہوئی ہے۔ پولیس کے مطابق دونوں افراد برآمد شدہ منشیات اور دیگر سامان کے بارے میں کوئی تسلی بخش جواب نہیں دے سکے۔
اس سلسلے میں پولیس تھانہ کٹرا میں ایف آئی آر نمبر 338/2026 درج کرکے این ڈی پی ایس ایکٹ کی دفعات 8/21/22/25/29 کے تحت کارروائی شروع کر دی گئی ہے۔ پولیس معاملے کی مزید تحقیقات کرتے ہوئے منشیات کے ذرائع، ان کی ممکنہ ترسیل اور اس کاروبار میں ملوث دیگر افراد کا پتہ لگانے کی کوشش کر رہی ہے۔
ریاسی پولیس نے منشیات کے غیر قانونی کاروبار کے خلاف سخت کارروائی جاری رکھنے کا عزم ظاہر کرتے ہوئے عوام سے اپیل کی ہے کہ وہ منشیات کی خرید و فروخت سے متعلق کسی بھی مستند اطلاع سے پولیس کو آگاہ کریں۔
ہندوستھان سماچار
---------------
ہندوستھان سماچار / محمد اصغر
