لندن میں بنگلہ دیشی سیاست کی گونج، عوامی لیگ اور این سی پی کے حامیوں میں خونریز جھڑپ، 19 کارکن زخمی
لندن، 22 نومبر(ہ س)۔ برطانیہ کے دارالحکومت لندن میں بنگلہ دیش کی سیاسی کشیدگی اس وقت سڑکوں پر آگئی جب عوامی لیگ اور نیشنل سٹیزن پارٹی (این سی پی) کے حامیوں کے درمیان زبردست جھڑپ ہوگئی۔ مشرقی لندن میں این سی پی کے کنوینر اور بنگلہ دیشی پارلیمنٹ میں
لندن میں بنگلہ دیشی سیاست کی گونج، عوامی لیگ اور این سی پی کے حامیوں میں خونریز جھڑپ، 19 کارکن زخمی


لندن، 22 نومبر(ہ س)۔ برطانیہ کے دارالحکومت لندن میں بنگلہ دیش کی سیاسی کشیدگی اس وقت سڑکوں پر آگئی جب عوامی لیگ اور نیشنل سٹیزن پارٹی (این سی پی) کے حامیوں کے درمیان زبردست جھڑپ ہوگئی۔ مشرقی لندن میں این سی پی کے کنوینر اور بنگلہ دیشی پارلیمنٹ میں اپوزیشن کے چیف وہپ ناہید اسلام کے اعزاز میں منعقدہ ایک تقریب کے بعد دونوں جماعتوں کے کارکن آمنے سامنے آگئے۔ اس تصادم میں دونوں گروپوں کے مجموعی طور پر کم از کم 19 افراد زخمی ہوئے ہیں۔بنگلہ دیشی اخبار ’پروتھوم آلو‘ کی 22 نومبر کی رپورٹ کے مطابق، این سی پی نے اپنے 16 کارکنوں کے زخمی ہونے کی اطلاع دی ہے، جبکہ عوامی لیگ کا کہنا ہے کہ اس کے کم از کم تین ارکان بھی زخمی ہوئے ہیں۔

ناہید اسلام کے برطانیہ دورے کی خبر سامنے آنے کے بعد ہی لندن میں موجود عوامی لیگ کے بعض رہنماؤں اور کارکنوں نے ان کے پروگرام میں خلل ڈالنے کا اعلان کیا تھا۔ عوامی لیگ کے کئی کارکنوں نے فیس بک کے ذریعے ناہید اسلام کے خلاف احتجاج کی اپیل کی تھی، جبکہ متعدد افراد کو واٹس ایپ پر بھی اس حوالے سے پیغامات موصول ہوئے تھے۔ اس سے قبل کیمبرج میں بھی ناہید اسلام کے ایک پروگرام کے دوران عوامی لیگ کے کارکنوں نے احتجاج کیا تھا۔

مشرقی لندن میں ناہید اسلام کے اعزاز میں منعقدہ تقریب کے باہر عوامی لیگ کے رہنماؤں اور حامیوں نے احتجاج کیا۔ مظاہرین کا کہنا تھا کہ وہ اپنے جمہوری حق کے تحت احتجاج کررہے ہیں۔تقریب کے مقام میفیر میں مہمانوں کی آمد سے پہلے ہی سکیورٹی کے سخت انتظامات کیے گئے تھے۔ منتظمین نے پولیس کے علاوہ این سی پی کی جانب سے 30 سے زیادہ نجی سکیورٹی اہلکار بھی تعینات کیے تھے۔

ایک ویڈیو میں دیکھا گیا کہ مظاہرین کے درمیان موجود ایک شخص نے ٹاور ہیملیٹس کونسل کے کونسلر اور کونسل کے سابق اسپیکر بیرسٹر سیف الدین خالد کی جانب پانی کی بوتل پھینکی۔ناہید اسلام پروگرام شروع ہونے سے تقریباً تین گھنٹے پہلے ہی میفیر پہنچ گئے تھے۔ حالات کشیدہ ہونے کے بعد رات 9 بج کر 55 منٹ پر سکیورٹی اہلکاروں کی مدد سے انہیں عقبی راستے سے باہر نکالا گیا۔ ان کی گاڑی سیڈر پارک گارڈنز سے متصل پارکنگ کے راستے وہاں سے روانہ ہوئی۔

ناہید اسلام کے روانہ ہونے کے بعد این سی پی کے مرکزی رہنما بیرسٹر نورالہدیٰ جنید کی قیادت میں پارٹی کے کارکن اور رہنما مرکزی دروازے سے باہر آئے اور نعرے بازی شروع کردی۔ اسی دوران دونوں گروپوں کے درمیان تصادم ہوگیا۔ جھڑپ کے دوران شیشے کی بوتلیں پھینکی گئیں اور درختوں کی ٹہنیوں کو بھی حملے کے لیے استعمال کیا گیا۔واقعے کے وقت عوامی لیگ کے کئی رہنما اور کارکن سیڈر پارک گارڈنز میں کھڑی اپنی گاڑیوں میں موجود تھے۔ ہال کے سامنے نعرے بازی شروع ہونے پر وہ گاڑیوں سے باہر نکل آئے، جس کے بعد دونوں گروپوں کے درمیان ہاتھا پائی اور مارپیٹ شروع ہوگئی۔ عینی شاہدین کے مطابق شیشے کی ایک بوتل این سی پی کے ایک کارکن کے سر پر لگی۔

مقامی رہائشیوں کیرن اور ایک دوسرے شخص نے بتایا کہ لوگوں نے ایک دوسرے پر بوتلیں پھینکیں، درختوں کی شاخیں توڑیں اور گھروں کے باہر موجود اشیا کو بھی حملوں کے لیے استعمال کیا۔ تاہم یہ واضح نہیں ہوسکا کہ تشدد کا آغاز کس جانب سے ہوا تھا۔

بنگلہ دیش پریس کلب یو کے کے صدر شاکر حسین نے دعویٰ کیا کہ سیڈر پارک گارڈنز سے این سی پی کے رہنماؤں اور کارکنوں کو پیچھے ہٹانے کے بعد عوامی لیگ کے ارکان نے انہیں لاٹھیوں اور درختوں کی ٹہنیوں سے مارا۔

این سی پی کے مرکزی رہنما بیرسٹر نورالہدیٰ جنید نے بتایا کہ ان کی گاڑیاں ہال کے عقب میں واقع سڑک اور کار پارک میں کھڑی تھیں۔ پروگرام ختم ہونے کے بعد جب وہ اپنی گاڑیوں کی جانب جارہے تھے تو وہاں پہلے سے موجود عوامی لیگ کے رہنماؤں اور کارکنوں نے اچانک ان پر حملہ کردیا۔

دوسری جانب عوامی لیگ سے وابستہ آن لائن کارکن سوشانت داس گپتا نے مختلف دعویٰ کیا۔ ان کے مطابق وہ ہال کے عقب میں سڑک پر کھڑے تھے، جہاں ایک سکیورٹی گارڈ کے ساتھ ان کی بحث ہوگئی۔ انہوں نے الزام لگایا کہ سکیورٹی گارڈ نے بحث کے دوران عوامی لیگ کے ایک کارکن کو دھکا دیا، جس کے بعد صورت حال بگڑ گئی۔سوشانت داس گپتا نے یہ بھی دعویٰ کیا کہ 5 اگست کے بعد سے بنگلہ دیش کے ضلع حبی گنج میں ان کے گھر کو دو مرتبہ آگ لگائی جاچکی ہے۔ ان کا کہنا تھا کہ اسی وجہ سے وہ ناہید اسلام کے پروگرام میں احتجاج کرنے پہنچے تھے۔

رپورٹ کے مطابق میفیر میں تقریب کے مقام کے قریب سیڈر پارک گارڈنز کے مشرقی جنکشن پر واقع ’الحُدیٰ ویلفیئر فاؤنڈیشن یو کے‘ میں مسجد اور مدرسہ بھی ہے۔ وہاں نماز ادا کرنے والے بنگلہ دیشی شہری حسین نے بتایا کہ واقعے کے بعد کئی مقامی رہائشیوں نے ان سے بنگلہ دیشیوں کے اس رویے پر ناراضگی ظاہر کی۔حسین کا کہنا تھا کہ مقامی لوگوں کی باتیں سن کر انہیں بحیثیت بنگلہ دیشی شرمندگی محسوس ہوئی۔ وہ کئی برسوں سے اس علاقے میں رہ رہے ہیں اور مقامی باشندوں کے ساتھ ان کے اچھے تعلقات ہیں۔انہوں نے امید ظاہر کی کہ مستقبل میں کوئی بنگلہ دیشی شہری برطانیہ کی سرزمین پر اس طرح کے واقعات میں ملوث نہیں ہوگا۔

ہندوستھان سماچار

ہندوستھان سماچار / Mohammad Khan


 rajesh pande