روس، چین، ایران اور شمالی کوریا کے خلاف برطانیہ چلائے گا جارحانہ سائبر آپریشن
لندن، 21 نومبر (ہ س)۔ برطانیہ نے پہلی بار کھل کر اعتراف کیا ہے کہ وہ روس، چین، ایران اور شمالی کوریا کے خلاف جارحانہ سائبر آپریشن چلا رہا ہے۔ برطانوی فوج کے ایک اعلیٰ افسر کے مطابق، ملک کی نیشنل سائبر فورس ان ممالک سے پیدا ہونے والے سائبر خطرات کا
روس، چین، ایران اور شمالی کوریا کے خلاف برطانیہ چلائے گا جارحانہ سائبر آپریشن


لندن، 21 نومبر (ہ س)۔ برطانیہ نے پہلی بار کھل کر اعتراف کیا ہے کہ وہ روس، چین، ایران اور شمالی کوریا کے خلاف جارحانہ سائبر آپریشن چلا رہا ہے۔ برطانوی فوج کے ایک اعلیٰ افسر کے مطابق، ملک کی نیشنل سائبر فورس ان ممالک سے پیدا ہونے والے سائبر خطرات کا مقابلہ کرنے کے لیے سرگرم ہے۔ اس کے علاوہ منظم جرائم میں ملوث گروہوں اور انٹرنیٹ کے ذریعے جرائم کرنے والوں کو بھی نشانہ بنایا جا رہا ہے۔

ترکی کی سرکاری خبر رساں ایجنسی اناطولو کے مطابق، برطانیہ کی سائبر اینڈ اسپیشلسٹ آپریشنز کمانڈ کے سربراہ جنرل روب میگوون نے اسکائی نیوز کو دیے گئے ایک انٹرویو میں اس بات کی تصدیق کی۔ اس سال کے آغاز میں عہدہ سنبھالنے کے بعد یہ ان کا پہلا انٹرویو تھا۔

جنرل میگوون نے کہا کہ جدید جنگ میں سائبر شعبے کی اہمیت مسلسل بڑھ رہی ہے۔ ان سے جب پوچھا گیا کہ کیا نیشنل سائبر فورس جارحانہ سائبر آپریشن بھی چلاتی ہے، تو انہوں نے واضح طور پر کہا کہ بالکل، برطانیہ اس معاملے پر پہلے بھی اپنا موقف واضح کرتا رہا ہے۔انہوں نے روس، چین، ایران اور شمالی کوریا کا ذکر کرتے ہوئے الزام لگایا کہ یہ ممالک برطانیہ کے طرزِ زندگی اور قومی سلامتی کے لیے خطرہ بن رہے ہیں۔ ان کے مطابق یہ ممالک سائبر شعبے میں مسلسل کارروائیاں کر رہے ہیں۔ انہوں نے خبردار کیا کہ جو ممالک سائبر دنیا میں برطانیہ کے خلاف کارروائیاں کریں گے، انہیں اس کی قیمت چکانی پڑے گی۔

جنرل میگوون نے کہا کہ نیشنل سائبر فورس کی ذمہ داری ایسے خطرات کا مقابلہ کرنا اور مخالفین کو جواب دینا ہے۔ اس کا کام صرف دوسرے ممالک کے خلاف کارروائی تک محدود نہیں، بلکہ یہ منظم جرائم میں ملوث گروہوں اور انٹرنیٹ کے ذریعے لوگوں کو نقصان پہنچانے والے مجرموں کے خلاف بھی کارروائی کرتی ہے۔انہوں نے خاص طور پر ایسے افراد کا ذکر کیا جو انٹرنیٹ کے ذریعے بچوں کو نقصان پہنچاتے ہیں۔ ان کا کہنا تھا کہ ایسے مجرموں کے خلاف کارروائی کرنا بھی نیشنل سائبر فورس کی حکمت عملی کا حصہ ہے۔

برطانیہ کی نیشنل سائبر فورس سے متعلق یہ انکشاف ایسے وقت میں سامنے آیا ہے، جب اسی ہفتے شاہ چارلس نے لنکاشائر کے علاقے سیمیلس بری میں اس فورس کے نئے ہیڈکوارٹر کا باضابطہ افتتاح کیا ہے۔فورس کی زیادہ تر کارروائیاں خفیہ رکھی جاتی ہیں۔ اس کے بیشتر آپریشن برطانیہ میں قائم مراکز سے انجام دیے جاتے ہیں، جن میں سیمیلس بری کا رِبل ہاؤس بھی شامل ہے۔

جنرل میگوون کے مطابق، نیشنل سائبر فورس مخالفین کے نیٹ ورک کے بارے میں معلومات جمع کرنے اور ان کے کمپیوٹر سسٹم میں اپنی رسائی قائم کرنے کے لیے جدید تکنیک استعمال کرتی ہے۔ ان میں کمپیوٹر نیٹ ورک ایکسپلائٹیشن بھی شامل ہے۔ اس طریقے کے ذریعے مخالفین کے نیٹ ورک اور ان کے نظام کو سمجھ کر سائبر شعبے میں مؤثر کارروائی کی جا سکتی ہے۔انہوں نے برطانیہ کو درپیش سائبر خطرات کو انتہائی سنگین قرار دیتے ہوئے کہا کہ ملک کی جارحانہ سائبر صلاحیتیں نئے خطرات کا مقابلہ کرنے اور قومی سلامتی کو یقینی بنانے کے لیے فوج کو کارروائی کے اضافی اختیارات فراہم کرتی ہیں۔

ہندوستھان سماچار

ہندوستھان سماچار / Mohammad Khan


 rajesh pande