ٹرمپ نے ایران کو بتایا پاگل، کہا واشنگٹن میں ڈرٹی بم حملے کی مبینہ منصوبہ بندی کو سنجیدگی سے لے رہے ہیں
واشنگٹن، 18 نومبر(ہ س)۔ امریکی صدر ڈونلڈ ٹرمپ نے ایران پر واشنگٹن میں ڈرٹی بم یا کیمیائی ہتھیاروں کے ذریعے امریکی حکام کو نشانہ بنانے کی مبینہ منصوبہ بندی کا الزام عائد کرتے ہوئے کہا ہے کہ ان کی حکومت اس طرح کے ممکنہ خطرات کو انتہائی سنجیدگی سے لے
ٹرمپ نے ایران کو بتایا پاگل، کہا واشنگٹن میں ڈرٹی بم حملے کی مبینہ منصوبہ بندی کو سنجیدگی سے لے رہے ہیں


واشنگٹن، 18 نومبر(ہ س)۔ امریکی صدر ڈونلڈ ٹرمپ نے ایران پر واشنگٹن میں ڈرٹی بم یا کیمیائی ہتھیاروں کے ذریعے امریکی حکام کو نشانہ بنانے کی مبینہ منصوبہ بندی کا الزام عائد کرتے ہوئے کہا ہے کہ ان کی حکومت اس طرح کے ممکنہ خطرات کو انتہائی سنجیدگی سے لے رہی ہے۔ ان کا کہنا ہے کہ ایران کو غیر متوقع اقدامات کرنے والا ملک سمجھتے ہوئے تمام خدشات کا جائزہ لیا جا رہا ہے۔

ٹرمپ نے یہ بیان امریکی نیوز چینل سی این این کی ایک رپورٹ پر ردعمل دیتے ہوئے دیا۔ مذکورہ رپورٹ میں امریکی حکام کے حوالے سے دعویٰ کیا گیا تھا کہ ایران ایسے منصوبوں پر غور کر رہا ہے جن کے تحت واشنگٹن میں صدر ٹرمپ کی انتظامیہ کے اعلیٰ عہدیداروں کو ڈرٹی بم یا کیمیائی ہتھیاروں کے ذریعے نشانہ بنایا جا سکتا ہے۔سی این این کی رپورٹ کے مطابق ان مبینہ منصوبوں کا جائزہ لیا جا رہا ہے، تاہم اس حوالے سے ایسا کوئی اشارہ نہیں ملا کہ ایران فوری طور پر کسی حملے کی تیاری کر رہا ہے۔ امریکی اخبار واشنگٹن پوسٹ نے بھی اس رپورٹ کی آزادانہ طور پر تصدیق نہیں کی ہے۔

رپورٹ سے متعلق صحافیوں کے سوالات کا جواب دیتے ہوئے ٹرمپ نے کہا کہ ایران پاگل ہے اور اسی وجہ سے ان کی انتظامیہ اس معاملے کو سنجیدگی سے لے رہی ہے۔ انہوں نے خبردار کیا کہ اگر ایران نے امریکہ پر حملہ کرنے کی کوشش کی تو اسے ایسی قیمت چکانی پڑے گی جس کی مثال تاریخ میں نہیں ملے گی۔ تاہم انہوں نے واضح کیا کہ فی الحال امریکہ کو کسی فوری حملے کا خطرہ لاحق نہیں ہے۔ادھر وائٹ ہاؤس کی ترجمان لارین بِس نے کہا ہے کہ امریکی حکام تمام ممکنہ خطرات پر مسلسل نظر رکھے ہوئے ہیں اور کسی بھی صورت حال سے نمٹنے کے لیے چوکس ہیں۔ ان کے مطابق اس وقت ملک کو کوئی فوری خطرہ درپیش نہیں ہے۔

دوسری جانب ایران نے واشنگٹن میں ڈرٹی بم حملے کی مبینہ منصوبہ بندی سے متعلق امریکی میڈیا کی رپورٹ کو بے بنیاد قرار دیتے ہوئے مسترد کردیا ہے۔ایرانی وزارت خارجہ کے ترجمان اسماعیل بقائی نے سوشل میڈیا پلیٹ فارم ایکس پر اپنے ردعمل میں سی این این کی رپورٹ کو من گھڑت اور بے بنیاد میڈیا بیانیہ قرار دیا۔ انہوں نے الزام لگایا کہ جن لوگوں نے ایران کے خلاف جارحیت شروع کی، وہ اب بے بنیاد الزامات گھڑ کر انہیں پھیلا رہے ہیں تاکہ اپنے مذموم مقاصد کے لیے میڈیا میں ماحول تیار کیا جا سکے۔

واضح رہے کہ امریکی صدر ڈونلڈ ٹرمپ ان دنوں فلپائن کے دورے پر ہیں، جہاں وہ جنوب مشرقی ایشیائی ممالک کی تنظیم (آسیان) کی سالانہ کانفرنس میں شرکت کر رہے ہیں۔ اپنے دورے کے اگلے مرحلے میں وہ چین کے شہر شینزن میں ایشیا پیسیفک اقتصادی تعاون (اے پی ای سی) فورم کے موقع پر چینی صدر شی جن پنگ اور روسی صدر ولادیمیر پیوٹن سے ملاقات کریں گے۔ایران اور امریکہ کے درمیان جاری کشیدگی کے تناظر میں واشنگٹن میں ممکنہ حملے سے متعلق یہ رپورٹ دونوں ممالک کے درمیان پہلے سے موجود تناؤ کو مزید نمایاں کرتی ہے۔ تاہم ایرانی حکومت نے ان الزامات کو مسترد کیا ہے اور امریکی حکام نے بھی کسی فوری حملے کے خطرے کی تصدیق نہیں کی ہے۔

ہندوستھان سماچار

ہندوستھان سماچار / Mohammad Khan


 rajesh pande