اجیت پوار کے انتقال کے ساتھ ہی این سی پی کے انضمام کی بات چیت ختم ہوگئی: سپریا سولے

۔ سنیل تٹکرے نے بھی انضمام کا امکان مسترد کیا، این ڈی اے میں برقرار رہنے کا اعلان

ممبئی، 14 نومبر (ہ س) نیشنلسٹ کانگریس پارٹی شرد پوار گروپ کی رہنما اور بارامتی کی رکن پارلیمنٹ سپریا سولے نے ہفتے کو کہا کہ این سی پی کے دونوں دھڑوں کے انضمام کی بات چیت ان کے چچازاد اجیت پوار کے 28 جنوری 2026 کو انتقال کے ساتھ ختم ہوگئی تھی۔ اس پر دوسرے دھڑے سے انہیں کوئی پیغام نہیں ملا۔ ان کا بیان شرد پوار کی قیادت والی این سی پی ایس پی اور نائب وزیراعلیٰ سنیترا پوار کی قیادت والی این سی پی کے اتحاد کی قیاس آرائیوں کے دوران آیا۔

صحافیوں سے سپریا سولے نے کہا کہ جب ان کے بھائی اور این سی پی سربراہ اجیت پوار زندہ تھے تو انضمام پر بات چیت ہورہی تھی اور ایک تاریخ بھی طے ہوچکی تھی۔ تاہم ان کے انتقال کے دن ہی ان کے لیے اور ان کی پارٹی کے اندر یہ معاملہ ختم ہوگیا۔ انہوں نے بتایا کہ اجیت پوار کے انتقال کے بعد ان کی پارٹی نے انضمام پر کوئی بیان نہیں دیا اور نہ دوسرے دھڑے کے بیانات کا جواب دیا۔

سپریا سولے نے بھارتیہ جنتا پارٹی کی قیادت والے قومی جمہوری اتحاد این ڈی اے میں اپنی پارٹی کی شمولیت کی قیاس آرائیاں بھی مسترد کیں۔ انہوں نے کہا کہ کوئی گفتگو نہیں ہوئی، جب بات شروع ہی نہیں ہوئی تو اسے ختم کرنے کا سوال کہاں پیدا ہوتا ہے۔ دوسری جانب مہاراشٹر این سی پی کے صدر سنیل تٹکرے نے کہا کہ ان کی پارٹی میں کسی سطح پر دونوں دھڑوں کے انضمام پر بات چیت نہیں ہورہی۔ انہوں نے انضمام کا امکان بھی مسترد کیا۔

سنیل تٹکرے نے پرفل پٹیل کی شرد پوار سے ملاقات کو سیاسی قرار دینے سے انکار کیا۔ ان کے مطابق پرفل پٹیل شرد پوار کی خیریت معلوم کرنے گئے تھے۔ انہوں نے کہا کہ ان کی پارٹی بھارتیہ جنتا پارٹی کی قیادت والے این ڈی اے میں برقرار رہے گی اور سنیترا پوار کی قیادت میں اتحاد کا حصہ بنی رہے گی۔ انہوں نے سنجے راؤت کے 20 سے 22 ارکان اسمبلی کے پالا بدلنے کے دعوے کو بھی بے بنیاد قرار دیا۔

ہندوستھان سماچار

ہندوستھان سماچار / جاوید این اے