جلگاؤں، 14 نومبر (ہ س)۔ مہاراشٹرکے جلگاؤں شہر اور ضلع کے مختلف علاقوں میں ہفتے کی صبح زلزلے کے ہلکے جھٹکے محسوس کیے گئے، جس سے شہریوں میں خوف و ہراس پھیل گیا۔ صبح تقریباً 9 بج کر 18 منٹ سے 9 بج کر 20 منٹ کے درمیان اچانک زمین میں لرزش محسوس ہوئی۔ ابتدائی اطلاعات میں زلزلے کی شدت 4.5 بتائی گئی ہے اور اس کا مرکز مدھیہ پردیش کے کھرگون میں ہونے کی اطلاع سامنے آئی ہے۔ تاہم زلزلے کی شدت اور مرکز کی سرکاری تصدیق ابھی نہیں ہوئی ہے۔جلگاؤں شہر کے علاوہ بھساول، یاول، راویر اور بودوڑ سمیت ضلع کے مختلف تعلقوں میں بھی جھٹکے محسوس کیے جانے کی اطلاعات ہیں۔ متعدد شہریوں نے بتایا کہ گھروں میں رکھی اشیا اچانک ہلنے لگیں، جس کے بعد انہیں زلزلے کا احساس ہوا۔ بعض مقامات پر پلنگ اور بستر ہلنے کی بات بھی سامنے آئی ہے۔ زمین میں چند لمحوں کی لرزش کے سبب لوگ گھبرا گئے۔ صبح کے وقت غیر متوقع طور پر آنے والے ان جھٹکوں سے مختلف علاقوں میں کچھ دیر تک بے چینی اور خوف کی کیفیت رہی۔زلزلے کے جھٹکے محسوس ہوتے ہی کئی شہری گھروں سے باہر نکل آئے۔ اطلاعات کے مطابق عمارتوں میں رہنے والے افراد نے یہ جھٹکے نسبتاً زیادہ محسوس کیے۔ اچانک پیش آنے والے واقعے کے بعد شہریوں میں کچھ وقت تک الجھن اور خوف کی کیفیت رہی۔ جلگاؤں اور اطراف کے علاقوں میں محسوس ہونے والی لرزش کے بارے میں ابتدائی معلومات سامنے آئی ہیں، لیکن سرکاری طور پر زلزلے کے درست مرکز اور اس کی شدت کی تصدیق کا انتظار ہے۔ ابتدائی طور پر بتائی گئی 4.5 شدت کی ابھی سرکاری تصدیق نہیں ہوئی۔دستیاب اطلاعات کے مطابق اس واقعے میں اب تک کسی جانی یا مالی نقصان کی خبر نہیں ملی ہے۔ کسی عمارت کے منہدم ہونے کی اطلاع بھی سامنے نہیں آئی۔ مقامی انتظامیہ نے زلزلے کے جھٹکوں کے واقعے کا نوٹس لیا ہے اور شہریوں سے اپیل کی ہے کہ وہ خوف زدہ نہ ہوں، البتہ محتاط اور چوکس رہیں۔ انتظامیہ نے لوگوں کو افواہوں پر یقین نہ کرنے کی ہدایت بھی دی ہے۔ہندوستھان سماچار

ہندوستھان سماچار / جاوید این اے