نئی دہلی، 14 نومبر (ہ س)۔ مہادیو آن لائن بک ایپ کے غیر قانونی سٹہ بازی نیٹ ورک کے خلاف مرکزی تحقیقاتی بیورو (سی بی آئی) نے چھ ریاستوں میں 33 مقامات پر چھاپہ مار کارروائی کی۔ گزشتہ چند دنوں کے دوران کی گئی اس کارروائی میں سٹہ بازی اور جوئے کے فعال پینل چلتے ہوئے پائے گئے، جنہیں بند کرا دیا گیا۔ تلاشی کے دوران فرضی بینک کھاتوں (میول اکاؤنٹس) اور حوالہ نیٹ ورک کے استعمال سے متعلق ڈیجیٹل آلات، موبائل فون اور قابل اعتراض دستاویزات ضبط کی گئیں۔

سی بی آئی کے مطابق، یہ کارروائی مہادیو ایپ کے اہم سرپرستوں میں سے ایک اور مرکزی ملزم سوربھ چندراکر سے پوچھ گچھ کے دوران حاصل ہونے والی معلومات کی بنیاد پر کی گئی۔ چندراکر کو عمان سے ہندوستان لائے جانے کے بعد یکم نومبر کو گرفتار کیا گیا تھا۔ رائے پور کی خصوصی سی بی آئی عدالت نے اسے آٹھ دن کی پولیس حراست میں بھیجا تھا۔ پوچھ گچھ کے دوران پلیٹ فارم کے کام کرنے کے طریقہ کار اور ہندوستان میں اس کے پینل آپریٹروں کے نیٹ ورک کے بارے میں اہم معلومات حاصل ہوئی تھیں۔

سی بی آئی نے امرتسر، دہلی، ناگور، دھول پور، بھوپال، رائے پور، درگ، اندور، احمد آباد، وڈودرا، سورت، ممبئی اور ناگپور میں تلاشی لی۔ تحقیقاتی ایجنسی نے بتایا کہ چھاپوں کے دوران ملنے والے ڈیجیٹل اور دستاویزی شواہد کے سلسلے میں بھی چندراکر سے پوچھ گچھ کی گئی۔

پولیس حراست کی مدت ختم ہونے کے بعد چندراکر کو 12 نومبر کو رائے پور کی خصوصی سی بی آئی عدالت میں پیش کیا گیا۔ عدالت نے اسے 19 نومبر تک عدالتی حراست میں بھیج دیا ہے۔

سی بی آئی نے بتایا کہ چھتیس گڑھ حکومت سے معاملہ منتقل ہونے کے بعد مہادیو آن لائن بک کے سلسلے میں دو ایف آئی آر درج کی گئی تھیں۔ اب تک کی تحقیقات میں سامنے آیا ہے کہ یہ پلیٹ فارم بیرون ملک واقع مرکزی دفتر سے چلایا جاتا ہے اور ہندوستان میں پینل آپریٹروں کے ایک بڑے نیٹ ورک کے ذریعے کام کرتا ہے۔

یہ آپریٹرز صارفین کی آئی ڈی سنبھالتے ہیں اور سٹہ بازی کی رقم ایسے بینک کھاتوں میں جمع کراتے ہیں، جو دوسرے لوگوں کے نام پر خاص طور پر کھولے گئے ہوتے ہیں یا کرائے پر لیے جاتے ہیں۔ اس کے بعد حوالہ کے ذریعے منافع کی رقم بیرون ملک بھیج دی جاتی ہے۔

تحقیقاتی ایجنسی اس غیر قانونی سرگرمی میں ملوث دیگر ملزمان، بیرون ملک موجود ملزمان، نیٹ ورک کو چلانے میں مدد کرنے والے افراد اور متعلقہ سرکاری ملازمین کے کردار کی بھی جانچ کر رہی ہے۔ مفرور ملزمان کو ہندوستان لانے کے لیے حوالگی کی کارروائی بھی کی جا رہی ہے۔

سی بی آئی نے عام لوگوں کو خبردار کیا ہے کہ آن لائن سٹہ بازی اور جوا کھیلنا غیر قانونی ہے۔ ایسی سرگرمیوں کے لیے اپنا بینک اکاؤنٹ، سم کارڈ یا شناختی دستاویزات کسی دوسرے شخص کو دینا یا کرائے پر فراہم کرنا بھی مجرمانہ فعل ہے۔ ایسا کرنے کی صورت میں متعلقہ کھاتہ دار کے خلاف قانونی کارروائی اور مقدمہ چلایا جا سکتا ہے۔

ہندوستھان سماچار

---------------

ہندوستھان سماچار / عبدالواحد