اسلام آباد (پاکستان)، 12 نومبر (ہ س)۔ پاکستان کے سابق وزیر اعظم عمران خان کی جماعت پاکستان تحریک انصاف (پی ٹی آئی) اور حکام کے درمیان پس پردہ (بیک چینل) مذاکرات میں ایک اہم پیش رفت سامنے آئی ہے۔ بتایا جا رہا ہے کہ پہلی بار عمران خان کا خاندان براہ راست اس عمل میں شامل ہوا ہے۔ اس سے آنے والے دنوں میں کسی بڑے حل کی امید پیدا ہوئی ہے۔

’دی نیوز‘ کی رپورٹ کے مطابق، سابق وزیر اعظم کے خاندان کی اس عمل میں شمولیت کو بڑھتی ہوئی سیاسی کشیدگی کم کرنے اور عمران خان، ان کے خاندان اور پی ٹی آئی کو درپیش مسائل کو ٹکراؤ کے بجائے بات چیت کے ذریعے حل کرنے کی سمت ایک اہم قدم قرار دیا جا رہا ہے۔

اس پیش رفت سے واقف ذرائع کا کہنا ہے کہ حالیہ مذاکرات میں کچھ پیش رفت ہوئی ہے، جس میں عمران خان کے خاندان کے افراد اور ان کی بہنوں کی ملاقات کا راستہ ہموار ہونا بھی شامل ہے۔ اسے آئندہ مذاکرات کے لیے سازگار ماحول بنانے کی جانب ایک مثبت قدم کے طور پر دیکھا جا رہا ہے۔

یہ امید بھی ظاہر کی جا رہی ہے کہ آنے والے دنوں میں کچھ ٹھوس نتائج سامنے آ سکتے ہیں، جن میں عمران خان کی کم از کم دو بہنوں کی رہائی کا امکان بھی شامل ہے۔ تاہم، ان کی رہائی کے حوالے سے ابھی تک کوئی سرکاری اعلان یا تصدیق نہیں کی گئی ہے۔

مانا جا رہا ہے کہ اس بیک چینل پہل میں پی ٹی آئی کی جانب سے کچھ اہم رہنما اور حکومت کی طرف سے چند افسران شامل ہیں۔ تاہم، مذاکرات میں شامل سرکاری نمائندے فی الحال اپنی شناخت ظاہر کرنے یا عوامی سطح پر اپنے کردار کو تسلیم کرنے کے لیے تیار نہیں ہیں۔

خیال کیا جا رہا ہے کہ پی ٹی آئی کے چیئرمین بیرسٹر گوہر علی خان ان مذاکرات کو آگے بڑھانے میں اہم کردار ادا کر رہے ہیں۔ جب ان سے اس بارے میں تبصرہ کرنے کے لیے کہا گیا تو انہوں نے مذاکرات کے کسی بھی پہلو پر بات کرنے سے انکار کرتے ہوئے کہا کہ وہ ایسے معاملات پر کچھ نہیں کہہ سکتے۔

عمران خان کے بہنوئی احد خان نے میڈیا سے گفتگو کے دوران بیک چینل رابطوں کی تصدیق کی ہے۔

یہ نئی پیش رفت ایسے وقت میں سامنے آئی ہے جب ملک کا سیاسی ماحول کافی کشیدہ ہے۔ مسلسل محاذ آرائی، عوامی بیان بازی اور سخت موقف کے باوجود اب تک کوئی بامعنی حل سامنے نہیں آ سکا ہے۔ اس کے برعکس، جاری تعطل نے پی ٹی آئی کی قیادت، عمران خان کے خاندان اور حکام کی مشکلات میں مزید اضافہ کیا ہے۔

اس پہل سے وابستہ لوگوں کا ماننا ہے کہ عمران خان کے خاندان کی شمولیت سے مذاکرات کے نئے راستے کھل سکتے ہیں اور مسائل کے حل کے لیے زیادہ تعمیری انداز اپنانے کی گنجائش پیدا ہو سکتی ہے۔ اس کا بنیادی مقصد سیاسی اختلافات کو مزید گہرا ہونے دینے کے بجائے بات چیت اور باہمی رابطے کے ذریعے متنازعہ معاملات کو حل کرنا ہے۔

ان مذاکرات میں خاندان کے افراد کی شرکت کافی اہم سمجھی جا رہی ہے، کیونکہ عمران خان اور ان کے رشتہ داروں سے متعلق مسائل اب وسیع تر سیاسی کشمکش کا حصہ بن چکے ہیں۔

اگرچہ ابھی یہ کہنا قبل از وقت ہوگا کہ ان رابطوں کا کیا نتیجہ نکلے گا، لیکن جس طرح مذاکرات میں پیش رفت کی خبریں سامنے آ رہی ہیں، ایک ملاقات ہو چکی ہے اور کچھ فوری راحت ملنے کا امکان ظاہر کیا جا رہا ہے، اس سے اشارہ ملتا ہے کہ یہ بیک چینل پہل اب ایک اہم مرحلے میں داخل ہو رہی ہے۔

ان رابطوں کا مقصد آنے والے دنوں میں مذاکرات کو ٹھوس اقدامات میں تبدیل کرنا ہے۔ ایک ذریعے کے مطابق، اس سے پی ٹی آئی اور حکام کے درمیان وسیع تر مفاہمت کی راہ ہموار ہو سکتی ہے۔ ذریعے نے کہا کہ اگر یہ کوشش کامیاب رہتی ہے تو طویل عرصے سے جاری سیاسی محاذ آرائی میں بڑی تبدیلی آ سکتی ہے اور مذاکرات کے ذریعے سیاسی کشیدگی کم کرنے کا ایک نیا موقع پیدا ہو سکتا ہے۔

ہندوستھان سماچار

---------------

ہندوستھان سماچار / عبدالواحد