نئی دہلی، 10 نومبر (ہ س)۔ بندرگاہ، جہاز رانی اور آبی گزرگاہوں کے وزیر سربانند سونووال اور دہلی کی وزیر اعلیٰ ریکھا گپتا نے منگل کو سونیا وہار میں دریائے یمنا پر تیار کی گئی ’نمو یمنا ریور کروز سروس‘ کا افتتاح کیا۔

اس موقع پر منعقدہ تقریب سے خطاب کرتے ہوئے وزیر اعلیٰ نے کہا کہ ماں یمنا دہلی کی شناخت، ثقافت، مذہبی عقیدت اور طرز زندگی کا ایک لازمی جزو ہیں۔ انہوں نے دہلی کے باشندوں کو مبارک باد دیتے ہوئے کہا کہ آج راجدھانی کے لیے ایک تاریخی موقع ہے۔

انہوں نے کہا کہ ’نمو یمنا ریور سفاری‘ محض کروز یا کشتی کی سروس نہیں ہے، بلکہ یہ ماں یمنا کے تئیں ہماری عقیدت، محبت اور وابستگی سے جڑی ایک پہل ہے۔ اس کے ذریعے دہلی کے باشندے ماں یمنا کے مزید قریب آ سکیں گے، ان کے قدرتی ماحول کو محسوس کر سکیں گے اور دریا کے ساتھ اپنے تعلق کو ایک نئے انداز میں تجربہ کر سکیں گے۔ اب دہلی کے لوگوں کو بھی فطرت کے اتنے قریب آنے کا موقع ملے گا۔ پہلے لوگ کشتی اور کروز کی سیر سے لطف اندوز ہونے کے لیے پریاگ راج یا دیگر شہروں کا رخ کرتے تھے، لیکن اب یہ سہولت دہلی میں ہی دستیاب ہوگی۔

اس موقع پر مرکزی وزرائے مملکت ہرش ملہوترا اور شانتنو ٹھاکر، رکن پارلیمنٹ منوج تیواری، دہلی کے وزیر پرویش صاحب سنگھ، سردار منجندر سنگھ سرسا اور کپل مشرا موجود تھے۔

وزیر اعلیٰ نے دہلی کے باشندوں سے اپیل کی کہ وہ اپنے اہل خانہ کے ساتھ یہاں آئیں، بچوں کو ماں یمنا کے درشن کرائیں اور قدرتی ماحول سے لطف اندوز ہوں۔ انہوں نے کہا کہ یہ پہل دہلی کی مثبت شبیہ کو مستحکم کرنے اور راجدھانی کی سیاحت کو نئی شناخت دینے کی سمت ایک اہم قدم ہے۔

وزیر اعلیٰ نے سابقہ حکومتوں پر الزام لگاتے ہوئے کہا کہ پہلے ترقیاتی کاموں کے بجائے الزام تراشی اور بہانے بازی کی سیاست ہوتی رہی، لیکن اب حکومت ان مسائل کو حل کرنے اور دہلی کے باشندوں کے لیے بہتر سہولتیں فراہم کرنے کی سمت کام کر رہی ہے۔

انہوں نے کہا کہ دہلی کے باشندوں کی مذہبی عقیدت اور روایات کا احترام حکومت کی ترجیحات میں شامل ہے۔ چھٹھ تہوار کا ذکر کرتے ہوئے انہوں نے کہا کہ پہلے دہلی کے لوگوں کو یمنا کے کنارے پوجا کرنے میں دشواریوں کا سامنا کرنا پڑتا تھا، لیکن موجودہ حکومت نے اپنے پہلے ہی سال میں یمنا کے کنارے بڑے پیمانے پر چھٹھ کا انعقاد کیا۔ انہوں نے امید ظاہر کی کہ اس سال بھی دہلی کے باشندے گزشتہ سال سے زیادہ بڑے پیمانے پر چھٹھ کا تہوار منائیں گے۔ دہلی کے عوام نے راجدھانی کی ترقی اور عوامی مفاد کے لیے حکومت کا انتخاب کیا ہے اور حکومت اسی ذمہ داری کے ساتھ کام کرتی رہے گی۔

دہلی کے وزیر برائے سیاحت کپل مشرا نے کہا کہ ’نمو یمنا ریور سفاری‘ دہلی میں سیاحت کے شعبے کو ایک نیا تجربہ فراہم کرنے والی پہل ہے۔ یہاں آنے والے لوگ یمنا کے خوب صورت مناظر سے لطف اندوز ہو سکیں گے۔ میوزیکل فاؤنٹین کے ذریعے بھگوان شری کرشن کی داستان اور یمنا میا کی عظمت کو موسیقی کے ذریعے بھی پیش کیا جائے گا۔ اس کے علاوہ یہاں کریئیٹو زون، فوڈ زون، گیمنگ سرگرمیوں اور بچوں کے لیے خصوصی زون جیسی سہولتیں بھی تیار کی گئی ہیں، تاکہ لوگ اپنے پورے خاندان کے ساتھ یہاں آ کر اچھا وقت گزار سکیں۔

یمنا کے کنارے سیاحت اور آمد و رفت کی سہولتوں کو فروغ دینے کے لیے دہلی حکومت اور انڈین ان لینڈ واٹر ویز اتھارٹی نے تفریحی کشتی رانی اور مختصر فاصلے کی فیری سروسز کا پائلٹ پروجیکٹ شروع کیا ہے۔ اس کے تحت وزیرآباد بیراج سے جگت پور تک تقریباً 6 کلومیٹر کا علاقہ آبی نقل و حمل کے لیے موزوں پایا گیا ہے، جہاں چھوٹے مسافر بردار جہازوں کے آپریشن کے لیے کم از کم 1.5 میٹر آبی گہرائی مقرر کی گئی ہے۔

اس پورے سفر میں تقریباً 35 سے 45 منٹ لگیں گے۔ مسافروں کو مقررہ راستے پر کشتی رانی کا تجربہ حاصل ہوگا اور سفر مکمل ہونے کے بعد وہ اپنے ابتدائی مقام پر واپس آ سکیں گے۔ مسافروں کے لیے تیار کردہ انتظامات کے تحت احاطے میں داخلے کی فیس 50 روپے اور کروز کے ایک مکمل سفر کا مجوزہ کرایہ 500 روپے مقرر کیا گیا ہے۔

اس پروجیکٹ کے تحت سونیا وہار سے جگت پور تک تقریباً 4 کلومیٹر کے علاقے میں تفریحی کروز اور فیری سروسز تیار کی گئی ہیں۔ اس کے ساتھ ہی سونیا وہار میں تمام ضروری سہولتوں سے آراستہ ایک ساحلی ٹرمینل بھی قائم کیا گیا ہے۔ اس پہل کا مقصد ماحول دوست نقل و حمل، شہری سیاحت اور عوامی سہولتوں کو فروغ دے کر دہلی کے قدرتی اور ثقافتی ورثے کو نئی شناخت دینا ہے۔ مانسون کے دوران دریا کی صورت حال کو مدنظر رکھتے ہوئے یہ سروس ہر سال یکم جولائی سے 30 ستمبر تک بند رہے گی۔

اس پروجیکٹ کے تحت دریائے یمنا میں 30 مسافروں کی گنجائش والا ایک الیکٹرک کروز چلایا گیا ہے۔ اسی گنجائش والا دوسرا الیکٹرک کروز فروری-مارچ 2027 تک شروع کیا جائے گا۔ اس کے ذریعے سیاح یمنا کے قدرتی ماحول، دریا کے کنارے موجود ہریالی اور دہلی کے ایک مختلف روپ کا تجربہ کر سکیں گے۔ الیکٹرک کروز سے ماحول دوست نقل و حمل اور پائیدار دریائی سیاحت کو فروغ ملے گا۔

سیاحوں کی سہولت کے لیے سونیا وہار میں ساحلی ٹرمینل تیار کیا گیا ہے۔ یہاں مسافروں کے سوار ہونے اور اترنے کے لیے دو فلوٹنگ جیٹیاں بنائی گئی ہیں۔ اس کے علاوہ ٹکٹ کاؤنٹر، گارڈ روم، فیس پر مبنی گاڑیوں کی پارکنگ، فوڈ کورٹ، انتظار گاہ اور تجارتی دکانوں کی سہولتیں بھی فراہم کی گئی ہیں۔

سونیا وہار میں تیار کیے گئے اس پروجیکٹ میں سیاحوں اور خاندانوں کے لیے بچوں کا پلے زون، تھیم پر مبنی میوزیکل فاؤنٹین، فوڈ کورٹ، تجارتی دکانیں اور تفریحی سہولتیں بھی قائم کی گئی ہیں۔ اس کے علاوہ یمنا کے قدرتی ماحول سے لطف اندوز ہونے کے لیے ایکو لوجیکل ٹریلس اور واکنگ ٹریلس بنائی گئی ہیں۔ پروجیکٹ میں الیکٹرک کروز کی چارجنگ کے لیے اسٹیشن، خواتین، مردوں اور معذور افراد کے لیے الگ الگ بیت الخلا، سیوریج ٹریٹمنٹ پلانٹ اور پینے کے پانی کے لیے بورویل کا انتظام بھی کیا گیا ہے۔

ان تمام سہولتوں کے ساتھ یمنا کے کنارے کشتی رانی اور دیگر تفریحی سرگرمیوں سے لطف اندوز ہونے کے لیے ایک منظم اور پرکشش سیاحتی مرکز تیار کیا گیا ہے۔ اس پروجیکٹ کو انڈین ان لینڈ واٹر ویز اتھارٹی نے دہلی ڈیولپمنٹ اتھارٹی (ڈی ڈی اے)، دہلی جل بورڈ، محکمہ آب پاشی و سیلاب کنٹرول اور دہلی ٹورزم اینڈ ٹرانسپورٹ ڈیولپمنٹ کارپوریشن کے اشتراک سے تیار کیا ہے۔

ہندوستھان سماچار

ہندوستھان سماچار / محمد شہزاد