یروشلم، 10 نومبر (ہ س)۔ اسرائیل کی 26ویں کنیسٹ (پارلیمنٹ) کا افتتاحی اجلاس اور حلف برداری کی تقریب آج شروع ہوگئی۔ اس تقریب میں صدر اسحاق ہرزوگ، کنیسٹ کے اسپیکر امیر اوہانا اور وزیر اعظم بنیامین نیتن یاہو شرکت کریں گے۔ پروگرام کا آغاز ہندوستانی وقت کے مطابق صبح 11 بج کر 30 منٹ (اسرائیلی وقت کے مطابق صبح 8 بجے) ہوچکا ہے۔
اخبار ’دی یروشلم پوسٹ‘ کی رپورٹ کے مطابق نو منتخب ارکانِ پارلیمنٹ کو پارلیمنٹ کے داخلی دروازے پر ان کے کوٹ پر لگانے کے لیے پھول پیش کیے گئے۔ نئے ارکان کا استقبال ’مسٹر ویل‘ اور ’مسز شگال‘ نامی دو روبوٹس نے کیا۔ اسرائیلی وقت کے مطابق سہ پہر 3 بج کر 20 منٹ پر کنیسٹ پلازا میں باضابطہ تقریب شروع ہوگی۔ اس موقع پر امیر اوہانا صدر اسحاق ہرزوگ کا استقبال کریں گے۔ کنیسٹ کے محافظ دستے صدر کے اعزاز میں رسمی پریڈ منعقد کریں گے۔ اس دوران اسرائیلی فوج (آئی ڈی ایف) کا آرکسٹرا بگل بجا کر ان کا استقبال کرے گا۔
اس کے بعد صدر کا پرچم لہرایا جائے گا۔ پھر ہرزوگ اور اوہانا اعزازی محافظ دستے کا معائنہ کریں گے۔ صدر کنیسٹ پلازا میں واقع اسرائیل کے شہید فوجیوں کی یادگار اور دہشت گردانہ حملوں کے متاثرین کی یاد میں تعمیر کی گئی یادگار پر گلہائے عقیدت بھی پیش کریں گے۔
اس کے بعد ہرزوگ اور اوہانا کنیسٹ اسپیکر کے دفتر کے داخلی ہال میں جائیں گے، جہاں صدر ’پریزیڈنٹس بک‘ (صدور کی کتاب) میں اپنے دستخط کریں گے۔ یہ ایک خصوصی کتاب ہے، جس میں اسرائیل کے صدر ہر نئی کنیسٹ کے لیے اپنا پیغام تحریر کرتے ہیں۔
اس کے بعد صدر نو منتخب ارکانِ پارلیمنٹ کی حلف برداری کی تقریب کے لیے ایوان میں داخل ہوں گے۔ کنیسٹ کی حلف برداری کی تقریب شام 4 بجے شروع ہوگی۔ ہرزوگ میز پر ہتھوڑی تین مرتبہ مار کر باضابطہ طور پر اجلاس کا آغاز کریں گے اور اس کے بعد خطاب کریں گے۔ پھر وہ اوہانا کو عہدے کا حلف لینے کے لیے مدعو کریں گے اور اجلاس کی صدارت کی ذمہ داری انہیں سونپ دیں گے۔
اوہانا کے خطاب کے بعد تمام 120 ارکانِ پارلیمنٹ باری باری حلف اٹھائیں گے۔ اوہانا اور نیتن یاہو بھی اجلاس سے خطاب کریں گے۔ اسرائیلی گلوکار ہارل اسکات اپنے فن کا مظاہرہ کریں گے۔
تقریب کا آغاز سب سے پہلے آنجہانی سارجنٹ ریف ہاروش کے والد ایوی ہاروش کے ذریعے ’کتابِ زبور‘ سے زبور 122 کی تلاوت سے ہوگا۔
ریف ہاروش اپریل 2024 میں جنوبی غزہ پٹی میں لڑائی کے دوران مارے گئے تھے۔ کنیسٹ کے مرکزی ہال میں نصب اسکرین پر اسرائیل کے اعلانِ آزادی کے کچھ اقتباسات بھی دکھائے جائیں گے۔ ان اقتباسات کو اسرائیل کے پہلے وزیر اعظم ڈیوڈ بن گوریون کی آواز میں سنایا جائے گا۔
اجلاس کا اختتام بچوں کے گائیکی گروپ ’پیرخے اشکلون‘ کی پیشکش کے ساتھ ہوگا۔ بچے اسرائیل کا قومی ترانہ ”ہاتیکوا“ پیش کریں گے۔
ہندوستھان سماچار
---------------
ہندوستھان سماچار / عبدالسلام صدیقی
