مغربی سنگھ بھوم، یکم نومبر(ہ س)۔ جھارکھنڈ کے مغربی سنگھ بھوم ضلع میں ہفتہ کی رات دو موٹر سائیکلوں کے درمیان زبردست ٹکر ہوگئی۔ اس حادثے میں 20 سالہ نوجوان کی موت ہوگئی، جبکہ دوسرا نوجوان شدید زخمی ہوگیا۔

مرنے والے نوجوان کی شناخت سومناتھ ہیمبرم کے طور پر ہوئی ہے۔ وہ للت ہیمبرم کے بیٹے تھے۔ زخمی نوجوان کی شناخت منوج پان کے طور پر ہوئی ہے، جو چائباسہ کے نہرو چوک، ٹنگری کا رہنے والا ہے۔

اسپتال پہنچنے پر ایک نوجوان کو مردہ قرار دیا گیا

یہ حادثہ مفصل تھانہ علاقے کے توئیبیر گاؤں کے قریب پیش آیا۔

حادثے کے بعد مقامی لوگوں نے پولیس کو اطلاع دی۔ پولیس موقع پر پہنچی اور دونوں نوجوانوں کو فوری طور پر صدر اسپتال چائباسہ لے گئی۔

اسپتال میں ڈاکٹروں نے معائنے کے بعد سومناتھ ہیمبرم کو مردہ قرار دے دیا، جبکہ زخمی منوج پان کا علاج جاری ہے۔ منوج کے ماتھے پر گہری چوٹ لگی ہے۔

فلپ کارٹ میں ڈلیوری بوائے کا کام کرتے تھے سومناتھ

معلومات کے مطابق، سومناتھ اپنے والدین کے ساتھ مفصل تھانہ علاقے کے پتاہاتو گاؤں میں کرائے کے مکان میں رہتے تھے۔ ان کا آبائی گاؤں کھرسواں تھانہ علاقے کا پدم پور (تیلی سائی) ہے۔

سومناتھ فلپ کارٹ میں ڈلیوری بوائے کے طور پر کام کرتے تھے۔

اہل خانہ نے بتایا کہ سومناتھ پہلے انٹرمیڈیٹ کی پڑھائی کر رہے تھے، لیکن بعد میں تعلیم چھوڑ کر ملازمت کرنے لگے تھے۔

خاندان میں ماتم

جوان بیٹے کی موت کی خبر ملتے ہی گھر میں کہرام مچ گیا اور اہل خانہ کا رو رو کر برا حال ہے۔

پولیس حادثے کی وجوہات کا پتہ لگانے میں مصروف ہے۔

ہندوستھان سماچار

---------------

ہندوستھان سماچار / عبدالسلام صدیقی