اننت ناگ، یکم نومبر (ہ س)۔ اننت ناگ پولیس نے 2026 کے پہلے دس ماہ کے دوران نارکوٹک ڈرگز اینڈ سائیکوٹروپک سبسٹینسز (این ڈی پی ایس) ایکٹ کے تحت 525 مقدمات درج کیے اور 602 منشیات فروشوں کو گرفتار کیا۔ یہ بات پولیس کی جانب سے جاری ایک بیان میں کہی گئی ہے۔

ضلع میں منشیات کے خلاف مہم کی تفصیلات دیتے ہوئے بیان میں کہا گیا ہے کہ ضلع بھر میں مختلف کارروائیوں کے دوران 597 کلوگرام سے زائد ممنوعہ مواد ضبط کیا گیا اور منشیات فروشوں سے 27.64 لاکھ روپے نقد برآمد کیے گئے۔ بیان کے مطابق، پولیس نے قانونی کارروائی مکمل کرنے کے بعد 2,000 کلوگرام نشہ آور مواد بھی تلف کیا۔

مالی محاذ پر، متعلقہ قانونی دفعات کے تحت 43 مقدمات میں تقریباً 63 کروڑ روپے مالیت کی جائیدادیں قرق کی گئیں۔ پولیس کے مطابق، منشیات کی کمائی سے جڑی 20 غیر قانونی جائیدادیں، جن کی مالیت 20 کروڑ روپے ہے، مسمار کی گئیں۔

بیان میں کہا گیا ہے کہ 305 مرلہ اراضی پر غیر قانونی طور پر کاشت کی گئی نشہ آور فصل تباہ کی گئی، جبکہ منشیات فروشوں کے قبضے سے 271 مرلہ سے زائد سرکاری اراضی واگزار کرائی گئی۔

اس عرصے کے دوران خواتین منشیات فروشوں اور 13 خواتین کاشتکاروں کو بھی گرفتار کیا گیا۔ بیان کے مطابق، آٹھ سرکاری ملازمین منشیات سے متعلق مقدمات میں ملوث پائے گئے ہیں، اور ان کے خلاف قانونی کارروائی شروع کر دی گئی ہے۔

احتیاطی اقدامات کے تحت 17 منشیات فروشوں کو پریوینشن آف الیسٹ ٹریفک ان نارکوٹک ڈرگز اینڈ سائیکوٹروپک سبسٹینسز (پٹ این ڈی پی ایس) ایکٹ کے تحت حراست میں لیا گیا۔ منشیات سے متعلق جرائم میں ملوث افراد کے 28 ڈرائیونگ لائسنس اور 22 گاڑیوں کے رجسٹریشن سرٹیفکیٹ منسوخ کیے گئے۔ پولیس نے ضلع میں منشیات کی نقل و حمل اور رسد روکنے کے لیے 300 نارکو سی اے ایس او (گھیرا بندی اور تلاشی کی کارروائیاں) بھی کیں۔

بیان کے مطابق، متعلقہ محکموں کے ساتھ مل کر 23 میڈیکل شاپس کا معائنہ کیا گیا، جن میں 23 خلاف ورزیاں پائی گئیں اور ان کے خلاف قانونی کارروائی شروع کی گئی۔ اس کے علاوہ این ڈی پی ایس مقدمات کی تفتیش کرنے والے 220 تفتیشی افسران کو ڈسٹرکٹ پولیس آفس اننت ناگ میں قانونی طریقہ کار اور شواہد کو سنبھالنے کی تربیت دی گئی۔

بیان میں کہا گیا ہے: ’’پولیس سماج سے منشیات کی لعنت کو ختم کرنے کے اپنے پختہ عزم کا اعادہ کرتی ہے۔‘‘ پولیس نے عوام، خاص طور پر نوجوانوں، سے منشیات سے متعلق سرگرمیوں کی نشاندہی اور اطلاع دینے میں تعاون کی اپیل کی ہے۔ بیان کے مطابق: ’’اس اجتماعی لڑائی میں عوام کا تعاون ہمارے معاشرے کے مستقبل کے تحفظ کے لیے نہایت اہم ہے۔‘‘

ہندوستھان سماچار

---------------

ہندوستھان سماچار / ظہور حسین بٹ