ڈھاکہ، یکم نومبر (ہ س)۔ بنگلہ دیش کی ڈھاکہ میٹروپولیٹن پولیس (ڈی ایم پی) کی جاسوسی شاخ (ڈی بی) نے مبینہ طور پر ریاست مخالف سازش، تشدد پر اکسانے، غیر قانونی فنڈنگ اور سوشل میڈیا پر پروپیگنڈہ کرنے کے معاملے میں ریٹائرڈ میجر کھنڈاکر عبدال حفیظ کو گرفتار کیا ہے۔ جاسوسی شاخ کے ایڈیشنل کمشنر ایم ڈی شفیق الاسلام نے بتایا کہ پولیس ٹیم نے جمعرات کی دیر رات دارالحکومت کے بنانی علاقے سے انہیں حراست میں لیا۔

’ڈھاکہ ٹریبیون‘ کی رپورٹ کے مطابق، جاسوسی شاخ کے ایڈیشنل کمشنر شفیق الاسلام نے آج بتایا کہ کھنڈاکر عبدالحفیظ کو اسی معاملے میں گرفتار کیا گیا ہے، جس کے تحت فوج کے دو دیگر سابق افسران کو پہلے ہی گرفتار کیا جا چکا ہے۔ شفیق الاسلام نے الزام لگایا کہ حفیظ، لیفٹیننٹ کرنل (ریٹائرڈ) دیباشیش کمار بروا اور لیفٹیننٹ (ریٹائرڈ) قاضی گلشن آرا ریاست مخالف سرگرمیوں میں ملوث تھے۔

دیباشیش کمار بروا اور قاضی گلشن آرا دہشت گردی مخالف قانون اور سائبر سکیورٹی آرڈیننس کی مختلف دفعات کے تحت پلّبی پولیس اسٹیشن میں درج مقدمے کے سلسلے میں فی الحال جیل میں ہیں۔ اس سے قبل جاسوسی شاخ نے 11 اکتوبر کی رات ڈھاکہ سے فوج کے دو ریٹائرڈ افسران کو گرفتار کیا تھا۔

اس سے پہلے دعویٰ کیا گیا تھا کہ کھنڈاکر عبدالحفیظ کو ملک میں عدم استحکام پیدا کرنے کی مبینہ سازش کے تحت عوامی لیگ کی سرگرمیوں سے ان کے مبینہ تعلقات کے بارے میں معلومات حاصل تھیں۔ واضح رہے کہ بنگلہ دیش میں عوامی لیگ کی سرگرمیوں پر فی الحال پابندی عائد ہے۔

جاسوسی شاخ کے مطابق، دونوں سابق فوجی افسران کو سوشل میڈیا پر ریاست مخالف پروپیگنڈہ کرنے میں مبینہ طور پر ملوث ہونے اور سائبر جرائم کے ذریعے عوامی تحفظ کو نقصان پہنچانے کی کوششوں سے متعلق مخصوص معلومات کی بنیاد پر گرفتار کیا گیا تھا۔

ہندوستھان سماچار

ہندوستھان سماچار / Mohammad Khan