ممبئی، 7 اکتوبر(ہ س)۔ بالی ووڈ اداکارہ کِیارا اڈوانی اور اداکار سدھارتھ ملہوترا جلد ہی دوسری بار والدین بننے والے ہیں۔ دونوں نے سوشل میڈیا پر ایک خوب صورت تصویر شیئر کرکے مداحوں کے ساتھ یہ خوشخبری بانٹی، جس کے بعد بالی ووڈ ستاروں اور مداحوں کی جانب سے انہیں مبارکباد دینے کا سلسلہ شروع ہوگیا۔

کِیارا اور سدھارتھ نے انسٹاگرام پر تصویر شیئر کرتے ہوئے لکھا، ’’ایک بار پھر ہمیں دنیا کے سب سے بڑے تحفے سے نوازا گیا ہے، ہمارا دل محبت اور تشکر سے بھر گیا ہے۔‘‘ تصویر میں دونوں اپنی بیٹی سرایا کے ساتھ نظر آرہے ہیں اور ہاتھوں میں ہاتھ سے بنے ننھے بچوں کے جوتے تھامے ہوئے ہیں۔خاص بات یہ ہے کہ دوسری بار والدین بننے کی خبر دینے کے لیے شیئر کی گئی تصویر کا انداز ان کی پہلی بیٹی کی پیدائش کی اطلاع دینے والی پوسٹ سے کافی ملتا جلتا ہے۔اس خوشی کے موقع پر فلمساز کرن جوہر نے سب سے پہلے ردعمل ظاہر کرتے ہوئے دل والے ایموجی کے ساتھ جوڑے کے لیے محبت کا اظہار کیا۔ اتھیا شیٹی، بھومی پیڈنیکر، ریا کپور اور معروف فیشن ڈیزائنر منیش ملہوترا سمیت کئی فلمی شخصیات نے بھی کِیارا اور سدھارتھ کو مبارکباد دی۔

کِیارا اڈوانی اور سدھارتھ ملہوترا نے فروری 2023 میں راجستھان میں شادی کی تھی۔ اس کے بعد 2025 میں دونوں پہلی بار والدین بنے اور ان کے یہاں بیٹی سرایا کی پیدائش ہوئی۔ دونوں اپنی نجی زندگی کو زیادہ تر میڈیا کی توجہ سے دور رکھتے ہیں اور خاص مواقع پر ہی مداحوں کے ساتھ اپنی ذاتی زندگی کی جھلکیاں شیئر کرتے ہیں۔

اب دوسری بار والدین بننے کی خبر نے ان کے مداحوں میں خوشی کی لہر دوڑا دی ہے اور سوشل میڈیا پر مبارکبادوں کا سلسلہ جاری ہے۔

ہندوستھان سماچار

ہندوستان سماچار / Mohammad Khan