بالاگھاٹ، 6 اکتوبر( ہ س) — راشٹریہ سویم سیوک سنگھ ( آر ایس ایس ) کے سربراہ ڈاکٹر موہن بھاگوت نے کہا کہ بالاصاحب دیورس اور بھاؤراؤ دیورس کی پوری زندگی ملک اور معاشرے کی خدمت کے لیے وقف رہی۔ انہوں نے کہا کہ جہاں عملی طور پر کام ہو رہا ہو، وہاں زیادہ بولنے کی ضرورت نہیں ہوتی، کیونکہ تقریر سے زیادہ اہم کام ہوتا ہے۔

ڈاکٹر بھاگوت مدھیہ پردیش کے بالاگھاٹ ضلع کے کارنجا گاؤں میں بالاصاحب اور بھاؤراؤ دیورس یادگاری عمارت کے افتتاح اور بالاصاحب دیورس نیتھرالیہ کے آنکھوں کے علاج و معائنے کے مرکز کے آغاز کی تقریب سے خطاب کر رہے تھے۔

انہوں نے کہا کہ بھارت کی مٹی اور ثقافت میں خدمت، حساسیت اور دوسروں کے لیے قربانی کے اقدار موجود ہیں۔ دوسروں کا دکھ دیکھ کر متاثر ہونا اور ان کی مدد کے لیے آگے بڑھنا بھارتی معاشرے کی روایات کا حصہ ہے۔

بھاگوت نے طیارہ حادثے کے دوران مسافروں کی جان بچانے والے بھارتی کپتان سمت مچھّر کا ذکر کرتے ہوئے کہا کہ زخمی ہونے کے باوجود انہوں نے اپنی جان کی پروا کیے بغیر مسافروں کو محفوظ رکھنے کی کوشش کی۔ انہوں نے اسے ایثار اور قربانی کی مثال قرار دیا۔

انہوں نے کہا کہ سنگھ لوگوں میں تنظیمی صلاحیت، ملک سے وابستگی اور معاشرے کی خدمت کا جذبہ پیدا کرتا ہے۔ سویم سیوک وہ ہے جو خود آگے بڑھ کر خدمت کرتا ہے اور اس کے بدلے کسی فائدے کی توقع نہیں رکھتا۔

ڈاکٹر بھاگوت نے کہا کہ کارنجا میں تعمیر کردہ یادگاری عمارت دیورس برادران کی زندگی، نظریات اور خدمات کی یادوں کو محفوظ رکھنے کے لیے بنائی گئی ہے۔ بالاصاحب دیورس نیترالیہ کے ذریعے دیہی اور قبائلی علاقوں کے لوگوں کو آنکھوں کے علاج کی سہولت فراہم کرنے کی کوشش کی جا رہی ہے۔

تقریب میں ٹرسٹ کے نائب صدر اروند مارڈیکر نے بھی دیورس برادران کی زندگی اور کارنجا سے ان کے تعلق پر روشنی ڈالی۔

ہندوستھان سماچار

---------------

ہندوستان سماچار / عبدالواحد