جیوتیرمٹھ، 30 اکتوبر (ہ س)۔ اتراکھنڈ کے ضلع چمولی میں جمعہ کو بدری ناتھ دھام سے دہرادون کے سہستردھارا واپس آنے والا ٹرانس بھارت ایوی ایشن پرائیویٹ لمیٹڈ کا ایک ہیلی کاپٹر حادثے کا شکار ہو گیا۔ اس حادثے میں پائلٹ سمیت ہیلی کاپٹر میں سوار تمام چھ افراد کی موت ہو گئی۔ ہیلی کاپٹر جیوتیرمٹھ تحصیل کے چائی گاؤں کے اوپر ایک دشوار گزار پہاڑی علاقے میں گر کر تباہ ہوا۔ فوج کی ٹیم نے جائے حادثہ پر پہنچ کر تمام چھ افراد کی موت کی تصدیق کی۔

ضلع ڈیزاسٹر مینجمنٹ افسر کی جانب سے جمعہ کی شام 5:30 بجے جاری کی گئی ابتدائی رپورٹ کے مطابق، ہیلی کاپٹر نے دوپہر تقریباً 1:12 بجے بدری ناتھ دھام سے دہرادون کے سہستردھارا ہیلی پیڈ کے لیے اڑان بھری تھی۔ اس کے بعد تقریباً دو بجے جیوتیرمٹھ تحصیل کے چائی گاؤں کے اوپر پہاڑی علاقے میں ہیلی کاپٹر حادثے کا شکار ہو گیا۔

ضلع ڈیزاسٹر مینجمنٹ محکمہ نے تصدیق کی ہے کہ ہیلی کاپٹر میں سوار پائلٹ سمیت تمام چھ افراد کی موقع پر ہی موت ہو گئی۔ حادثے کی اطلاع ملتے ہی ضلع انتظامیہ، فوج، پولیس، ہند-تبت سرحدی پولیس (آئی ٹی بی پی)، قومی آفات سے نمٹنے والی فورس (این ڈی آر ایف) اور ریاستی آفات سے نمٹنے والی فورس (ایس ڈی آر ایف) کی ٹیمیں فوری طور پر جائے حادثہ کی طرف روانہ ہو گئی تھیں۔

فوج کی نویں آزاد ماؤنٹین بریگیڈ کے افسران سے حاصل ہونے والی معلومات کی بنیاد پر انتظامیہ کی جانب سے جاری کردہ مہلوکین کی فہرست کے مطابق، حادثے میں پائلٹ ہمانشو سبھروال کے علاوہ پانچ مسافر ارون سالونکے، ایچ ایس نٹراج، پرتاپ بچیہلی ننگراجن، سدھیر کے اور شنکر گوڑا وی بی ہلاک ہوئے ہیں۔ پانچوں مسافروں کا تعلق کرناٹک سے بتایا گیا ہے۔

اتراکھنڈ شہری ہوابازی ترقیاتی اتھارٹی (یو سی اے ڈی اے) کے مطابق، حادثے کا شکار ہونے والے ہیلی کاپٹر کا کال سائن وی ٹی-ایچ سی ایکس تھا۔ اس نے بدری ناتھ سے سہستردھارا کے لیے پرواز کی تھی، لیکن جوشی مٹھ وادی کے اوپر پرواز کے دوران اس سے رابطہ منقطع ہو گیا۔ ٹریکنگ سسٹم بھی ہیلی کاپٹر کے مقام کا پتا نہیں لگا سکا۔

اطلاع ملتے ہی بھارتی فوج، چمولی ضلع انتظامیہ اور ایس ڈی آر ایف کی ٹیموں کو تلاش اور بچاؤ مہم کے لیے روانہ کیا گیا۔ احتیاطی اقدام کے طور پر یو سی اے ڈی اے نے ٹرانس بھارت ایوی ایشن کے تمام ہیلی کاپٹروں کی پروازوں پر پابندی لگا دی تھی۔

بعد میں فوج کی ٹیم نے جیوتیرمٹھ تحصیل کے چائی گاؤں کے قریب جائے حادثہ پر پہنچ کر تصدیق کی کہ ہیلی کاپٹر میں سوار پائلٹ سمیت تمام چھ افراد کی موت ہو چکی ہے۔

اتراکھنڈ کے وزیراعلیٰ پشکر سنگھ دھامی نے چمولی ضلع میں پیش آنے والے ہیلی کاپٹر حادثے میں قیمتی جانوں کے ضیاع پر گہرے دکھ کا اظہار کیا ہے۔ انہوں نے ہلاک ہونے والوں کی روح کے سکون کے لیے دعا کی اور غم زدہ خاندانوں سے تعزیت کا اظہار کیا۔

وزیراعلیٰ نے متعلقہ افسران کو حادثے کی وجوہات کی تفصیلی تحقیقات کرنے کی ہدایت دی ہے۔ انہوں نے کہا کہ حادثے کے تمام پہلوؤں کی سنجیدگی سے جانچ کی جائے۔ اس کے ساتھ ہی ضلع انتظامیہ کو ہدایت دی کہ متاثرہ خاندانوں کو ہر ممکن مدد فراہم کی جائے اور ضروری امدادی اقدامات اور دیگر انتظامات فوری طور پر یقینی بنائے جائیں۔

ریاست کے گورنر ڈاکٹر ڈھال سنگھ بیسن نے بھی ہیلی کاپٹر حادثے میں ہونے والے جانی نقصان پر افسوس کا اظہار کیا ہے۔ انہوں نے ہلاک ہونے والوں کی روح کے سکون کی دعا کرتے ہوئے سوگوار اہل خانہ سے دلی تعزیت کا اظہار کیا۔

ہندوستھان سماچار

---------------

ہندوستھان سماچار / عبدالسلام صدیقی