کولکاتا، 3 اکتوبر (ہ س)۔ مغربی بنگال کے وزیر اعلیٰ شبھیندو ادھیکاری نے 2021 کے اسمبلی انتخابات کے دوران نندی گرام میں سابق وزیر اعلیٰ ممتا بنرجی کے پیر میں چوٹ لگنے کے واقعے کو ’جھوٹا دعویٰ‘ قرار دیا ہے۔ ہفتہ کو ریاستی سیکریٹریٹ نواں میں منعقدہ پریس کانفرنس کے دوران اسپتال کے دستاویزات پیش کرتے ہوئے وزیر اعلیٰ نے دعویٰ کیا کہ اس دن ممتا بنرجی کے پیر میں کوئی فریکچر ہوا ہی نہیں تھا۔ انہوں نے اعلان کیا کہ انتخابی مہم کے دوران کی گئی اس ’جھوٹی تشہیر‘ کی ریاستی حکومت کی جانب سے تفصیلی جانچ کرائی جائے گی، جس کا باضابطہ اعلان نندی گرام ضمنی انتخاب کا عمل مکمل ہونے کے بعد کیا جائے گا۔
وزیر اعلیٰ نے بنگور انسٹی ٹیوٹ آف نیورو سائنسز کے شعبہ ریڈیو ڈائیگنوسس کی 11 مارچ 2021 کی ایک میڈیکل رپورٹ دکھاتے ہوئے کہا کہ اس وقت کی وزیر اعلیٰ نے اپنی مبینہ چوٹ کے معاملے میں پورے نندی گرام کے لوگوں کی توہین کی تھی۔ شبھیندو ادھیکاری کے مطابق میڈیکل دستاویز میں واضح طور پر درج ہے کہ کسی بھی قسم کے فریکچر کے کوئی شواہد نہیں ملے تھے۔ انہوں نے کہا کہ فی الحال نندی گرام میں مثالی انتخابی ضابطہ اخلاق نافذ ہے اور معاملہ سی آئی ڈی کے پاس بھی ہے۔ اس لیے ضابطہ اخلاق ختم ہونے کے بعد، یعنی 9 اکتوبر کے بعد حکومت اس مبینہ جھوٹی تشہیر کے خلاف ازسرنو جانچ اور کارروائی کی سمت طے کرے گی۔
دوسری جانب، اس وقت ممتا بنرجی کے علاج کے لیے تشکیل دیے گئے میڈیکل بورڈ کے ایک رکن نے اس دعوے پر وضاحت پیش کی ہے۔ ڈاکٹر کے مطابق جس رپورٹ کا حوالہ دیا جا رہا ہے، وہ صرف بائیں گھٹنے کے سی ٹی اسکین کی رپورٹ تھی، جبکہ سابق وزیر اعلیٰ کے ٹخنے اور پیر کے نچلے حصے میں چوٹیں آئی تھیں۔ انہوں نے بتایا کہ سی ٹی اسکین کے علاوہ ایم آر آئی اور ایکس رے سمیت کئی دیگر طبی جانچیں بھی کرائی گئی تھیں۔ انتخابی مہم کو مدنظر رکھتے ہوئے آرتھوپیڈک، سرجری، نیورو میڈیسن اور نیورو سرجری کے سینئر ماہرین پر مشتمل مشترکہ میڈیکل ٹیم نے ایس ایس کے ایم اسپتال کے ڈائریکٹر کی نگرانی میں متفقہ طور پر علاج کا فیصلہ کیا تھا، جسے کسی ایک رپورٹ کی بنیاد پر مسترد نہیں کیا جا سکتا۔
پریس کانفرنس کے دوران وزیر اعلیٰ شبھیندو ادھیکاری نے درگا پوجا کے موقع پر ریاست کے عوام کے لیے خصوصی راشن پیکیج کا بھی اعلان کیا۔ انہوں نے بتایا کہ اس مرتبہ تقریباً دو کروڑ خاندانوں کو تہوار کے دوران رعایتی نرخوں پر غذائی اشیا فراہم کی جائیں گی، جبکہ سابق حکومت کے دور میں یہ فائدہ صرف 50 لاکھ خاندانوں تک محدود تھا۔
نئی اسکیم کے تحت اہل خاندانوں کو 19 روپے فی کلوگرام کی شرح سے میدہ فراہم کیا جائے گا، جس پر 19 روپے فی کلوگرام کی سبسڈی ریاستی حکومت برداشت کرے گی۔ اسی طرح 30 روپے فی کلوگرام کی شرح سے چینی فراہم کی جائے گی، جس پر باقی 30 روپے کی رعایت حکومت دے گی۔ اس کے علاوہ تہوار کے دوران ہر خاندان کو 500 گرام سوجی فراہم کرنے کی تیاری بھی آخری مرحلے میں ہے۔
ہندوستھان سماچار
ہندوستان سماچار / Mohammad Khan
