پونے میں بچیوں کی شرح پیدائش میں کمی پر تشویش، غیر قانونی جنس کی تشخیص کے خلاف کارروائی کی ہدایت
پونے، 28 اکتوبر (ہ س)۔ مہاراشٹر قانون ساز کونسل کی رکن اور سابق نائب چیئرپرسن ڈاکٹر نیلم گورہے نے بچیوں کی پیدائش کے تئیں مثبت رویہ پیدا کرنے کے لیے صرف ماؤں کے بجائے باپ اور خاندان کے دیگر افراد کی بھی کونسلنگ کرنے کی ہدایت دی ہے۔ شیوسینا رہنما نے کہا کہ بیٹے کی خواہش میں خواتین پر دباؤ ختم کرنے کے لیے پورے خاندان کی ذہنیت بدلنا ضروری ہے۔ پی سی پی این ڈی ٹی اور ایم ٹی پی قوانین کی ریاستی ٹاسک فورس اور گنا کاٹنے والی خواتین مزدوروں کی رحم دانی کی سرجری سے متعلق کمیٹی کی سربراہ کی حیثیت سے انہوں نے منگل کو پونے میں جائزہ اجلاس منعقد کیا۔ اجلاس میں رکن اسمبلی اوما کھاپرے، ڈاکٹر سندیپ سانگلے، ڈاکٹر بھگوان پوار اور طبی افسران شریک ہوئے۔
اجلاس میں بتایا گیا کہ پونے ضلع میں 2025 کے دوران ہر 1,000 رجسٹرڈ لڑکوں کے مقابلے 895 لڑکیاں درج ہوئیں، جبکہ یکم جنوری سے 25 اکتوبر 2026 تک یہ تعداد 882 رہی۔ دیہی علاقوں میں شرح 844 اور شہری علاقوں میں 888 تھی۔ اعداد میں تاخیر سے درج پیدائشیں بھی شامل ہیں۔ ڈاکٹر گورہے نے تعلقہ وار وجوہات جانچنے، آشا کارکنوں کے ذریعے بیداری بڑھانے اور اس کے نتائج پرکھنے کی ہدایت دی۔ دیہی حدود میں 11 سرکاری اور 354 نجی سونوگرافی مراکز، جبکہ 30 سرکاری اور 225 نجی اسقاط حمل مراکز درج ہیں۔ پونے میونسپل حدود میں 988 سونوگرافی اور 430 ایم ٹی پی، جبکہ پمپری چنچوڑ میں بالترتیب 637 اور 291 مراکز ہیں۔
انہوں نے گاڑیوں اور غیر مجاز مقامات پر غیر قانونی جنس کی تشخیص روکنے، خفیہ اطلاعات کی جانچ اور پولیس کی مدد سے کارروائی کی ہدایت دی۔ شیرور، ارولی کانچن اور داؤنڈ کے مقدمات کا جائزہ لیا گیا۔ پونے میونسپل رپورٹ کے مطابق مختلف عدالتوں میں 21، 11 اور 7 مقدمات زیرالتوا ہیں، جبکہ ضلع سرجن دفتر نے مزید 7 مقدمات بتائے۔ انہوں نے خصوصی سرکاری وکلاء، قانونی مدد اور مقدمات کے جلد تصفیے پر زور دیا۔
گنا مزدوروں کی 6,383 خواتین میں 512 خون کی کمی سے متاثر ملیں اور انہیں آئرن گولیاں دی گئیں۔ 118 حاملہ خواتین میں 12 کو خون کی کمی تھی۔ مارچ 2023 سے پہلے رحم دانی نکالنے کی 7 سرجریاں ضلع سے باہر ہوئیں، بعد کی تعداد صفر بتائی گئی۔ ڈاکٹر گورہے نے علاج کی تکمیل، محفوظ زچگی، صحت ریکارڈ کی منتقلی، طبی ضرورت کی جانچ اور رازداری کے ساتھ کونسلنگ یقینی بنانے کو کہا۔ دیوالی کے بعد سماجی، خواتین اور طبی نمائندوں کی تعلقہ وار آن لائن میٹنگ بھی ہوگی۔
ہندوستھان سماچار
--------------------
ہندوستھان سماچار / جاوید این اے
