لکھنؤ، 28 اکتوبر (ہ س)۔ اتر پردیش کی راجدھانی لکھنؤ کے سادات گنج تھانہ علاقے میں تین افراد کے قتل کے معاملے میں ملزم رشبھ شکلا کے گھر پر دیر رات بلڈوزر کی کارروائی کی گئی۔ اس دوران پولیس، لکھنؤ ڈیولپمنٹ اتھارٹی (ایل ڈی اے) اور میونسپل کارپوریشن کی ٹیمیں موجود تھیں۔

ایل ڈی اے کے ایڈیشنل سکریٹری گیانیندر ورما کے مطابق، جانچ میں ملزم کے مکان کا ایک حصہ سرکاری نزول اراضی پر غیر قانونی طور پر تعمیر کیا ہوا پایا گیا۔ اس حصے کی نشاندہی کرکے نزول اراضی کے افسران نے اسے چاروں طرف سے سیل کر دیا تھا۔ دیر رات محکمہ کا بلڈوزر ملزم کے گھر پہنچا اور قانونی کارروائی مکمل کرنے کے بعد غیر قانونی حصے کو منہدم کر دیا گیا۔ کارروائی کے دوران ہنگامہ آرائی کے خدشے کے پیش نظر بڑی تعداد میں پولیس اہلکار تعینات کیے گئے تھے۔ محکمہ کے افسران کے ساتھ پولیس کے سینئر افسران بھی موقع پر موجود تھے۔

قابل ذکر ہے کہ پیر کو گاڑی پارک کرنے کے دوران ہوئے تنازعے میں پڑوسی رشبھ نے شیواجی تیواری (65)، ان کے بھائی شیویندر تیواری (55) اور ان کے بیٹے سویش تیواری کو گولی مار کر قتل کر دیا تھا۔ مقتول شیوا تیواری سکریٹریٹ سے ریٹائرڈ تھے اور راشٹریہ سویم سیوک سنگھ (آر ایس ایس) کے ضلع سرکاریہ واہ بھی رہ چکے تھے۔

واقعے کے بعد اہل خانہ نے لاشیں سڑک پر رکھ کر احتجاج کیا تھا۔ اس دوران خاندان کے افراد کے ساتھ بی جے پی اور سنگھ کے کارکنان اور عہدیداران بھی موجود تھے۔ اہل خانہ کے مطالبے پر نائب وزیر اعلیٰ برجیش پاٹھک موقع پر پہنچے اور انہیں یقین دلایا کہ ان کے ساتھ انصاف کیا جائے گا اور ملزم کے خلاف سخت کارروائی ہوگی۔ اس کے بعد انتظامیہ نے کارروائی شروع کر دی۔

ہندوستھان سماچار

ہندوستھان سماچار / محمد شہزاد