یروشلم ، 28 اکتوبر (ہ س)۔ اسرائیل کے وزیر اعظم بنجامن نیتن یاہو آج کچھ دیر قبل لیکوڈ پارٹی کے انتخابی دفتر پہنچے۔ انہوں نے دائیں بازو کی حکومت تشکیل دینے کی اپیل کرتے ہوئے عرب جماعتوں پر انحصار کرنے کے خلاف خبردار کیا۔ نیتن یاہو نے کہا کہ ”لیکوڈ اسرائیل کی سب سے بڑی پارٹی ہے۔“ انہوں نے دعویٰ کیا کہ دائیں بازو کے اتحاد کو یہودی اور صیہونی ووٹروں کے ساتھ ساتھ یہودی ریاست کے حامیوں کی بھی فیصلہ کن حمایت حاصل ہے۔

دی ٹائمز آف اسرائیل اور دی یروشلم پوسٹ کی رپورٹوں کے مطابق، ملک میں منگل کو کنیسٹ (پارلیمنٹ) کے لیے ہونے والے انتخابات کی ووٹوں کی گنتی جاری ہے۔ صبح 4 بج کر 51 منٹ تک 32.5 فیصد ووٹنگ مراکز کے بیلٹ بکسوں کی گنتی مکمل ہو چکی تھی۔ مرکزی انتخابی کمیٹی کے مطابق، ابتدائی نتائج میں نیتن یاہو کی حمایت کرنے والے اتحاد کو 59 نشستیں، جبکہ ان کے مخالف اتحاد کو 46 نشستیں حاصل ہوئی ہیں۔ کمیٹی نے واضح کیا کہ یہ نتائج جزوی ہیں اور گنتی آگے بڑھنے کے ساتھ ان میں تبدیلی ممکن ہے۔

لیکوڈ پارٹی کے انتخابی دفتر میں وزیر اعظم کے حامی جشن منا رہے ہیں۔ بنجامن نیتن یاہو نے اپنے خطاب میں 7 اکتوبر 2023 کو حماس کے حملے کے بعد سے اسرائیل کی جانب سے لڑی گئی جنگوں میں حاصل ہونے والی کامیابیوں کا ذکر کیا۔ انہوں نے کہا، ”ایران پہلے کے مقابلے میں کہیں زیادہ کمزور ہو گیا ہے، جبکہ اسرائیل پہلے سے کہیں زیادہ مضبوط ہو چکا ہے۔“ انہوں نے کہا کہ امریکی صدر ڈونالڈ ٹرمپ کے ساتھ مل کر اسرائیل، ایرانی خطرے کو ہمیشہ کے لیے ختم کر دے گا۔ نیتن یاہو نے کہا، ”ہم اب بھی حتمی نتائج کا انتظار کر رہے ہیں۔“

نیتن یاہو نے ان ذرائع ابلاغ کو بھی تنقید کا نشانہ بنایا جنہوں نے انتخابات میں لیکوڈ پارٹی کی خراب کارکردگی کی پیش گوئی کی تھی۔ انہوں نے کہا، ”اسی لیے ہمیں دائیں بازو کی، قوم پرست اور مضبوط حکومت کی ضرورت ہے۔“

دریں اثنا، ’کان‘ اور چینل 13 کے تازہ ایگزٹ پول کے مطابق، نیتن یاہو کے اتحاد اور چار جماعتوں پر مشتمل اپوزیشن اتحاد کو 51-51 نشستیں ملنے کا امکان ہے، جبکہ عرب جماعتوں کو 18 نشستیں مل سکتی ہیں۔ چینل 12 کے مطابق، نیتن یاہو کے اتحاد کو 52، اپوزیشن اتحاد کو 49 اور عرب جماعتوں کو 19 نشستیں ملنے کا امکان ظاہر کیا گیا ہے۔

ہندوستھان سماچار

ہندوستھان سماچار / محمد شہزاد