ممبئی ، 28 اکتوبر (ہ س) ۔ مہاراشٹر قانون ساز کونسل کی 5 نشستوں کے انتخابات میں برسراقتدار مہایوتی اتحاد نے 2 ٹیچر انتخابی حلقوں میں کامیابی حاصل کرلی ہے، جبکہ 3 گریجویٹ حلقوں میں ووٹوں کی گنتی جاری ہے۔ پونے ٹیچر حلقے سے بھارتیہ جنتا پارٹی کے کوستبھ گاوڑے اور امراوتی ٹیچر حلقے سے شیوسینا کے شندے گروپ کے کرن سرنائک کامیاب ہوئے ہیں۔ ان نشستوں کے لیے 21 اکتوبر کو ووٹنگ ہوئی تھی، جبکہ منگل کی صبح 8 بجے گنتی شروع ہوئی۔ تقریباً 32 گھنٹے بعد بدھ کو دونوں ٹیچر حلقوں کے نتائج کا اعلان کیا گیا۔امراوتی ٹیچر انتخابی حلقے میں شیوسینا شندے گروپ کے کرن سرنائک نے کانگریس کی ادیتی پوہرے کو شکست دی، جبکہ شری کانت دیش پانڈے تیسرے مقام پر رہے۔ کرن سرنائک نے اس حلقے سے مسلسل دوسری مرتبہ کامیابی حاصل کی ہے۔ پونے ٹیچر حلقے میں بی جے پی کے کوستبھ گاوڑے فاتح رہے۔ یہاں شیوسینا شندے گروپ کے سچن سانپ دوسرے اور کانگریس کے جینت آسگاؤنکر تیسرے مقام پر رہے۔ ان دونوں نتائج کے ساتھ مہایوتی نے ٹیچر حلقوں کی دونوں نشستیں جیت لی ہیں۔دوسری جانب ناگپور گریجویٹ انتخابی حلقے میں بی جے پی کے سدھاکر کوہلے اور کانگریس کے ابھیجیت بنجاری کے درمیان سخت مقابلہ جاری ہے۔ تازہ رجحانات میں سدھاکر کوہلے آگے ہیں۔ پونے گریجویٹ حلقے میں مہاوکاس اگھاڑی کی حمایت یافتہ نیشنلسٹ کانگریس پارٹی شردچندر پوار کی امیدوار ہرشدا دیشمکھ جادھو، بی جے پی کی سمیتا جادھو سے آگے چل رہی ہیں۔ اسی طرح اورنگ آباد گریجویٹ حلقے میں مہاوکاس اگھاڑی کے امیدوار، نیشنلسٹ کانگریس پارٹی شردچندر پوار کے پرتاپ سنگھ پاٹل نے نیشنلسٹ کانگریس پارٹی اجیت پوار کے ستیش چوہان پر سبقت حاصل کر رکھی ہے۔ تینوں گریجویٹ حلقوں میں ووٹوں کی گنتی جاری ہے اور حتمی نتائج دیر رات تک آنے کی توقع ہے۔
ہندوستھان سماچار
--------------------
ہندوستھان سماچار / جاوید این اے
