بنگلورو، 27 اکتوبر(ہ س)۔ کرناٹک میں ووٹر لسٹ کی خصوصی جامع نظرثانی (ایس آئی آر) کا عمل مکمل ہونے کے بعد الیکشن کمیشن نے منگل کو حتمی ووٹر لسٹ جاری کردی۔ نظرثانی سے پہلے ریاست میں 5,54,32,314 ووٹر درج تھے، جبکہ نئی فہرست میں یہ تعداد گھٹ کر 4,55,00,011 رہ گئی ہے۔ اس طرح ووٹروں کی تعداد میں مجموعی طور پر 99,32,303 کی خالص کمی ہوئی ہے۔
چیف الیکٹورل آفیسر انبو کمار نے پریس کانفرنس میں بتایا کہ حتمی فہرست میں 2,25,40,493 مرد، 2,29,12,355 خواتین اور 2,841 تیسری جنس کے ووٹر شامل ہیں۔ اس کے علاوہ 18 سے 19 سال کی عمر کے 6.83 لاکھ سے زیادہ نوجوانوں کو بھی فہرست میں جگہ ملی ہے۔نظرثانی کے پہلے مرحلے میں گھر گھر جاکر ووٹروں کی تفصیلات کی تصدیق کی گئی تھی۔ 24 اگست کو جاری مسودہ فہرست میں 4,46,35,975 ووٹر درج تھے۔ غیر موجودگی، مستقل نقل مکانی، موت، ایک سے زیادہ اندراج اور دیگر وجوہات کی بنیاد پر 1,07,96,339 نام مسودہ فہرست سے ہٹائے گئے تھے۔مسودہ فہرست جاری ہونے کے بعد نام شامل کرانے، حذف کرنے اور تفصیلات میں ترمیم کے لیے درخواستیں طلب کی گئی تھیں۔ حتمی فہرست تیار کرنے کے دوران ناموں اور تفصیلات کی جانچ بھی کی گئی۔
انبو کمار کے مطابق، ناموں کے ملاپ میں تضادات اور دیگر تکنیکی وجوہات کی بنا پر 43,82,824 نوٹس جاری کیے گئے تھے، جن پر سماعت اور کارروائی مکمل کرلی گئی ہے۔حتمی فہرست میں نام شامل کرانے کے لیے فارم 6 کے تحت 7,87,534 درخواستیں موصول ہوئیں، جبکہ بیرون ملک مقیم ہندوستانیوں کی رجسٹریشن کے لیے فارم 6 اے کے تحت 4,530 درخواستیں آئیں۔ نام حذف کرنے کے لیے فارم 7 کے تحت 58,475 اور تفصیلات میں ترمیم کے لیے فارم 8 کے تحت 10,99,907 درخواستیں موصول ہوئیں۔چیف الیکٹورل آفیسر نے ووٹروں سے اپیل کی کہ وہ حتمی فہرست میں اپنا نام، پولنگ اسٹیشن کے حصے اور ترتیب نمبر کی جانچ کرلیں۔ نام غائب ہونے یا تفصیلات میں غلطی کی صورت میں متعلقہ انتخابی افسر سے رابطہ کرکے ضروری دستاویزات کے ساتھ درخواست دی جاسکتی ہے۔
ہندوستھان سماچار
ہندوستھان سماچار / Mohammad Khan
