امپھال، 27 اکتوبر (ہ س)۔ منی پور کے امپھال مشرقی ضلع میں بونگبل کھولین کے اطراف چلائی گئی مشترکہ خفیہ کارروائی کے دوران سکیورٹی فورسز نے بھاری مقدار میں ہتھیار، گولہ بارود اور دھماکہ خیز مواد برآمد کیا۔ پولیس کی جانب سے رات گئے دی گئی سرکاری اطلاع کے مطابق، یہ کارروائی سی آر پی ایف کے ایم این سیکٹر کی کوئک ایکشن ٹیم (کیو اے ٹی)، رینج امپھال کی کیو اے ٹی اور امپھال مشرقی کے کمانڈو دستے نے مشترکہ طور پر انجام دی۔
کارروائی کے دوران ایک اے-1 رائفل، ایک .303 ایل ایم جی، میگزین سمیت ایک 9 ایم ایم پستول، دو 12 بور کی ڈبل بیرل بندوقیں، تین 12 بور کی سنگل بیرل بندوقیں اور میگزین سمیت مقامی طور پر تیار کردہ ایک 9 ایم ایم پستول برآمد کی گئی۔
اس کے علاوہ، ڈیٹونیٹر کے بغیر تین نمبر 36 ہینڈ گرینیڈ، ایک چینی ہینڈ گرینیڈ، ایک ایم جی-2 رائفل گرینیڈ، ایک پومپی شیل، چار وائرلیس ریڈیو سیٹ اور ایک چارجر بھی ضبط کیا گیا۔ سکیورٹی فورسز نے موقع سے مختلف اقسام کے گولہ بارود کا بڑا ذخیرہ بھی برآمد کیا۔
برآمد کیے گئے تمام ہتھیاروں، گولہ بارود اور دیگر سامان کو مزید قانونی کارروائی کے لیے تھوبل ڈیم پولیس اسٹیشن کے حوالے کر دیا گیا ہے۔
ہندوستھان سماچار
---------------
ہندوستھان سماچار / عبدالواحد
