وارانسی، 25 اکتوبر (ہ س)۔ وزیرِ اعظم نریندر مودی نے اتوار کے روز یومِ فضائیہ کی 94ویں سالگرہ کے موقع پر منعقدہ ’ونگز اوور گنگا‘ ایئر شو کا مشاہدہ کیا۔ ایئر شو کے دوران نمو گھاٹ، گنگا کے دیگر تمام 84 گھاٹوں اور دریا کے دوسری جانب ریتیلے علاقے میں موجود لوگوں کے جوش و خروش اور اپنے رکنِ پارلیمنٹ و وزیرِ اعظم کی موجودگی پر خوشی کا اظہار واضح طور پر دیکھنے کو ملا۔
وزیرِ اعظم نے مرزا مراد کے خوچواں علاقے میں کپڑا تیار کرنے والی کمپنی اروند لمیٹڈ (اروند ملز) کے تقریباً 150 کروڑ روپے کی لاگت سے قائم پہلے مینوفیکچرنگ پلانٹ کا افتتاح کیا۔ اس کے بعد وہ نمو گھاٹ پہنچے، جہاں یومِ فضائیہ کی 94ویں سالگرہ کے موقع پر منعقدہ ’ونگز اوور گنگا‘ ایئر شو کا مشاہدہ کیا۔
وزیرِ اعظم بابَت پور ہوائی اڈے سے ہیلی کاپٹر کے ذریعے مرزا مراد کے خوچواں پہنچے۔ یہاں انہوں نے اروند ملز کا افتتاح کیا اور خواتین ملازمین سے بات چیت کی۔
اس کے بعد وزیرِ اعظم نریندر مودی ہیلی کاپٹر کے ذریعے پولیس لائن گراؤنڈ کے ہیلی پیڈ پہنچے اور وہاں سے سڑک کے راستے ایئر فورس ڈے ایریل ڈسپلے 2026 میں شرکت کے لیے نمو گھاٹ روانہ ہوئے۔
اس پورے راستے سمیت وارانسی کے 13 اہم مقامات پر کاشی کے باشندوں نے اپنے رکنِ پارلیمنٹ اور وزیرِ اعظم کا شاندار استقبال کیا۔ ایئر شو شروع ہونے سے قبل لوگوں نے پرچم اور ٹوپیاں لگا کر وزیرِ اعظم کا استقبال کیا اور ان کے تئیں احترام کا اظہار کیا۔
اس موقع پر وزیرِ دفاع راج ناتھ سنگھ، اتر پردیش کے وزیرِ اعلیٰ یوگی آدتیہ ناتھ، مرکزی وزیرِ مملکت برائے دفاع سنجے سیٹھ، مرکزی وزیرِ مملکت برائے خزانہ اور ریاستی بی جے پی صدر پنکج چودھری، نائب وزرائے اعلیٰ کیشو پرساد موریہ اور برجیش پاٹھک سمیت متعدد معزز شخصیات موجود تھیں۔
ایئر شو میں سوریہ کرن طیاروں کی شاندار فضائی پیشکش کے ساتھ وارانسی کا ایئر شو اختتام پذیر ہوا۔ اس سے قبل طیارے کے کاک پٹ سے بھارتی فضائیہ کی جانب سے کاشی کے تمام باشندوں کے لیے دلی نیک خواہشات کا پیغام بھی نشر کیا گیا۔
ہندوستھان سماچار
---------------
ہندوستان سماچار / عبدالسلام صدیقی
