بھوپال، 25 اکتوبر (ہ س)۔ مدھیہ پردیش میں دیوالی سے قبل موسم ایک بار پھر کروٹ لینے والا ہے۔ 28 اکتوبر کو ریاست کے مشرقی حصے میں شدید بارش کا انتباہ جاری کیا گیا ہے۔ خلیج بنگال میں سرگرم کم دباو کے علاقے کے اثر سے ریاست کے کئی علاقوں میں تیز بارش، گرج چمک اور بوندا باندی ہونے کا امکان ہے۔ اس دوران رات کے درجہ حرارت میں گراوٹ کے باعث سردی کا اثر بھی بڑھنے لگا ہے۔ کٹنی کے کروندی میں کم سے کم درجہ حرارت 12.1 ڈگری سیلسیس درج کیا گیا، جو ریاست میں سب سے کم رہا۔
محکمہ موسمیات کے مطابق، خلیج بنگال کے اوپر کم دباو کا ایک علاقہ سرگرم ہے۔ آنے والے دنوں میں اس کے شدت اختیار کر کے ڈپریشن میں تبدیل ہونے کا امکان ہے۔ اس کا اثر مدھیہ پردیش کے موسم پر بھی دکھائی دے گا۔ 28 اکتوبر کو ریاست کے تقریباً آدھے حصے میں کہیں تیز تو کہیں ہلکی بارش ہو سکتی ہے۔ محکمہ موسمیات نے شہڈول، انوپ پور، ڈنڈوری، منڈلا اور بالاگھاٹ میں شدید بارش کے آثار ظاہر کیے ہیں۔
وہیں گوالیار، بھنڈ، دتیا، شیوپوری، گنا، اشوک نگر، جبل پور، کٹنی، نرسنگھ پور، چھندواڑہ، پانڈھرنا، سیونی، ریوا، ستنا، سیدھی، سنگرولی، مئوگنج، میہر، امریا، ساگر، پنا، دموہ، چھترپور، ٹیکم گڑھ اور نیواڑی میں گرج چمک کے ساتھ بوندا باندی ہو سکتی ہے۔ ان علاقوں میں بادل چھائے رہنے کا بھی امکان ہے۔ دوسری جانب بھوپال، اندور، نرمدا پورم اور اجین ڈویژن میں موسم صاف رہنے کا امکان ہے۔ یہاں دن میں دھوپ کھلی رہے گی۔
ریاست میں اگلے تین دنوں تک بارش کا کوئی امکان نہیں ہے۔ اس کے بعد 28 اکتوبر سے نئے موسمی نظام کے زیر اثر متعدد علاقوں میں موسم تبدیل ہو سکتا ہے۔ دیوالی سے قبل بارش کا یہ سلسلہ ریاست کے مختلف حصوں کو متاثر کر سکتا ہے۔ ریاست میں بارش کا سلسلہ تھمنے کے بعد رات کے درجہ حرارت میں گراوٹ آئی ہے۔ گزشتہ رات کٹنی کے کروندی میں کم سے کم درجہ حرارت 12.1 ڈگری سیلسیس درج کیا گیا۔ اس کے علاوہ اندور میں 13.4 ڈگری، امرکنٹک میں 13.6 ڈگری، دموہ اور پچمڑھی میں 14 ڈگری، جبکہ شاجاپور اور بیتول میں 14.5 ڈگری سیلسیس درجہ حرارت ریکارڈ کیا گیا۔
رات کے ساتھ ساتھ دن کے درجہ حرارت میں بھی کمی دیکھی جا رہی ہے۔ ریاست کے بیشتر شہروں میں زیادہ سے زیادہ درجہ حرارت 30 ڈگری سیلسیس سے نیچے برقرار ہے۔ امرکنٹک، ملاج کھنڈ، شیوپوری، بیتول اور پچمڑھی میں زیادہ سے زیادہ درجہ حرارت 27.4 سے 29.4 ڈگری سیلسیس کے درمیان درج کیا گیا۔
محکمہ موسمیات نے بتایا کہ اکتوبر کے آخری ہفتے میں ریاست میں بارش کا ایک اور دور دیکھنے کو مل سکتا ہے۔ نئے سسٹم کا اثر شمال مغربی حصے میں بھی دکھائی دینے کا امکان ہے۔ اس کے ساتھ ہی رات کے درجہ حرارت میں مزید گراوٹ آ سکتی ہے۔ اس طرح اکتوبر کے آخری ہفتے میں ریاست کے کئی علاقوں میں بارش کے ساتھ سردی کا اثر بھی بڑھنے کے آثار ہیں۔
ہندوستھان سماچار
---------------
ہندوستان سماچار / انظر حسن
