سری نگر، 24 اکتوبر (ہ س): وزیر اعلیٰ عمر عبداللہ نے ہفتہ کے روز کہا کہ انہوں نے لیفٹیننٹ گورنر منوج سنہا سے ملاقات کے دوران اپنی کابینہ میں توسیع اور کچھ تبدیلیاں کرنے کے لیے اگلے ہفتے کے اوائل میں وقت مانگا ہے۔ سری نگر میں لیفٹیننٹ گورنر سے ملاقات کے بعد میڈیا سے بات کرتے ہوئے عمر عبداللہ نے کہا کہ انہوں نے ایل جی سنہا سے درخواست کی ہے کہ وہ انہیں اگلے ہفتے کے پہلے دو تین دنوں میں وقت دیں۔ انہوں نے کہا: ’’میں نے ان سے توسیع کے لیے وقت مانگا ہے۔ میں نے ان سے درخواست کی ہے کہ اگلے ہفتے کے پہلے دو تین دنوں میں وہ مجھے وقت دیں۔ میں اپنی کابینہ میں کچھ تبدیلیاں اور توسیع کروں گا۔‘‘
انہوں نے کہا کہ لیفٹیننٹ گورنر انہیں وقت دیں گے اور توسیع کی جائے گی۔ انہوں نے کہا: ’’ایل جی صاحب مجھے وقت دیں گے اور توسیع ہو جائے گی۔‘‘
وزیر اعلیٰ نے کہا کہ وہ لیفٹیننٹ گورنر کی خیریت دریافت کرنے کے لیے ان سے ملے تھے، کیونکہ سنہا کی طبیعت ناساز تھی اور وہ چند روز بعد سری نگر واپس آئے ہیں۔ انہوں نے کہا کہ کئی امور پر لیفٹیننٹ گورنر سے بات چیت اور ان کا مشورہ لینا بھی ضروری تھا، اور چونکہ ان سے ملے کافی عرصہ ہو گیا تھا، اس لیے انہوں نے ملاقات کے لیے وقت مانگا جو انہیں دے دیا گیا۔
اسکا اعتراف کرتے ہوئے کہ میڈیا کے نمائندے یہ جاننا چاہتے ہیں کہ آیا ردوبدل پر بات ہوئی یا نہیں، عمر عبداللہ نے کہا: ’’ضرور کی۔‘‘
ایکس پر ایک پوسٹ میں جموں و کشمیر کے لیفٹیننٹ گورنر کے دفتر نے بتایا کہ وزیر اعلیٰ نے لیفٹیننٹ گورنر سے ملاقات کی۔ پوسٹ میں ملاقات کی کوئی تفصیل نہیں دی گئی۔
یہ ملاقات کابینہ میں طویل عرصے سے زیر التوا توسیع کے بارے میں ایک بار پھر تیز ہونے والی قیاس آرائیوں کے درمیان ہوئی ہے۔ نیشنل کانفرنس کے صدر فاروق عبداللہ نے توسیع کو لیفٹیننٹ گورنر کی واپسی سے جوڑا تھا۔ 19 اکتوبر کو بڈگام میں نامہ نگاروں سے بات کرتے ہوئے انہوں نے کہا تھا کہ لیفٹیننٹ گورنر علیل تھے اور وادی سے باہر تھے، اور یہ عمل ان کی واپسی کے بعد ہی ہوگا۔ انہوں نے کہا تھا کہ توسیع اس لیے نہیں ہوئی کہ لیفٹیننٹ گورنر کی طبیعت ناساز تھی، اور سنہا کے واپس آنے کے بعد ’’حکومت میں توسیع ہوگی‘‘۔
عمر عبداللہ نے 7 اکتوبر کو کہا تھا کہ دہلی میں جی ایس ٹی کونسل کی میٹنگ اور فاروق عبداللہ سے مشاورت کے بعد یہ عمل شروع کیا جائے گا۔ نیشنل کانفرنس کی قیادت والی حکومت نے 16 اکتوبر کو اقتدار میں دو سال مکمل کیے، لیکن کونسل آف منسٹرز میں توسیع نہیں کی گئی۔
ہندوستھان سماچار
---------------
ہندوستان سماچار / ظہور حسین بٹ
