- ووٹنگ صبح آٹھ بجے سے سہ پہر چار بجے تک ہوگی

لکھنو، 23 اکتوبر (ہ س)۔

اترپردیش قانون ساز کونسل کے گریجویٹ اور ٹیچرز انتخابی حلقوں کی 11 نشستوں کے دو سالہ انتخابات کے لیے جمعہ 23 اکتوبر کی صبح ووٹنگ شروع ہو گئی۔ پولنگ مراکز کے لیے پولنگ پارٹیاں جمعرات کی شام مراکز پر پہنچ کر انتظامات سنبھال چکی ہیں۔ اس دو سالہ انتخابات-2026 کے لیے سیکورٹی انتظامات سخت کر دیے گئے ہیں۔ ووٹنگ صبح آٹھ بجے سے سہ پہر چار بجے تک ہوگی۔

اترپردیش قانون ساز کونسل کی 11 نشستوں میں آگرہ حلقہ گریجویٹ اور ٹیچر، میرٹھ حلقہ گریجویٹ اور ٹیچر، بریلی-مرادآباد حلقہ ٹیچر، لکھنو حلقہ گریجویٹ اور ٹیچر، وارانسی حلقہ گریجویٹ اور ٹیچر، الٰہ آباد-جھانسی حلقہ گریجویٹ اور گورکھپور-فیض آباد ٹیچر انتخابی حلقہ شامل ہیں۔ ریاستی الیکشن کمیشن کی ہدایت کے بعد متعلقہ اضلاع کے ضلع مجسٹریٹس اور سینئر سپرنٹنڈنٹ آف پولیس نے پولنگ مراکز پر سہ سطحی سیکورٹی کا گھیرا تیار کیا ہے تاکہ کسی قسم کی گڑبڑی نہ ہوسکے۔ 23 اکتوبر کو صبح 08 سے سہ پہر 04 بجے تک پولنگ ہوگی۔ کانپور نگر، کانپور دیہات اور اناو کو چھوڑ کر ریاست کے 72 اضلاع میں ووٹنگ ہوگی۔

گریجویٹ اور ٹیچرز انتخابی حلقوں کے اس انتخاب میں ریاست بھر میں 14 لاکھ 81 ہزار 310 ووٹرز ہیں، جو 152 امیدواروں کی قسمت کا فیصلہ کریں گے۔ پولنگ کو پرامن طریقے سے منعقد کرانے کے لیے کمیشن کی جانب سے 11 آبزرور، 1041 سیکٹر مجسٹریٹس اور 456 زونل مجسٹریٹس بھی تعینات کیے گئے ہیں۔ اس کے ساتھ ہی پولنگ کے مقامات پر مائیکرو آبزرورز کی تعیناتی کے ساتھ ساتھ ویڈیو گرافی کا بھی انتظام کیا گیا ہے۔ ووٹرز اپنے شناختی کارڈ کے طور پر آدھار کارڈ، ڈرائیونگ لائسنس، پین کارڈ، ہندوستانی پاسپورٹ، ملازمین اپنے آجر کی طرف سے جاری کردہ شناختی کارڈ، ڈگری یا ڈپلوما کی اصل سند، مجاز اتھارٹی کی جانب سے جاری کردہ معذوری کی اصل سند میں سے کوئی ایک شناختی دستاویز دکھا کر ووٹ ڈال سکیں گے۔ اس کے ساتھ ہی اراکین اسمبلی، اراکین پارلیمنٹ اور کونسلرز اپنے سرکاری شناختی کارڈ سے ووٹ دے سکیں گے۔

پولنگ کے پیش نظر سیاسی جماعتیں اور امیدوار اب اپنے اپنے بوتھ مینجمنٹ میں مصروف ہیں تاکہ کوئی بھی حامی ووٹر حق رائے دہی سے محروم نہ رہنے پائے اور زیادہ سے زیادہ ووٹ اپنے حق میں ڈلوائے جا سکیں۔ بوتھوں پر ان جماعتوں اور امیدواروں کے اپنے اپنے نمائندے بھی خصوصی طور پر موجود ہیں۔

ووٹنگ کے پیش نظر حکومتِ اترپردیش نے آج پولنگ کے دن خصوصی ہنگامی رخصت کا اعلان کیا ہے تاکہ ووٹنگ میں زیادہ سے زیادہ اہل ووٹرز اپنے حقِ رائے دہی کا استعمال کر سکیں۔ ووٹرز کو یہ رخصت ملنے سے اب وہ اپنی سہولت کے مطابق ووٹ ڈال سکیں گے۔ اس سلسلے میں متعلقہ اضلاع سے بھی احکامات جاری کیے گئے ہیں۔

اترپردیش کے چیف الیکٹورل آفیسر نودیپ رنوا نے بتایا کہ الیکشن کمیشن آف انڈیا کی ہدایات کے تحت اتر پردیش قانون ساز کونسل کے 05 گریجویٹ اور 06 ٹیچرز انتخابی حلقوں کے دو سالہ انتخابات-2026 کے تحت آج ہونے والی ووٹنگ کے دن ووٹر لسٹ میں ووٹر کی تفصیلات میں جزوی تحریری یا طباعت سے متعلق غلطیوں کی بنیاد پر کسی بھی ووٹر کو اس کے حقِ رائے دہی سے محروم نہیں کیا جائے گا۔ انہوں نے بتایا کہ اس سلسلے میں تمام متعلقہ ضلع الیکشن افسران کو ضروری کارروائی یقینی بنانے کی ہدایات جاری کر دی گئی ہیں۔

ہندوستھان سماچار

ہندوستان سماچار / انظر حسن