رائے پور، 22 اکتوبر (ہ س)۔ صدر جمہوریہ دروپدی مرمو 22 اور 23 اکتوبر کو چھتیس گڑھ کے دو روزہ دورے پر رہیں گی۔ صدر جمہوریہ دروپدی مرمو آج (22 اکتوبر 2026) صبح 11.15 بجے رائے پور ہوائی اڈے پر پہنچیں گی۔ وزیر اعلیٰ وشنو دیو سائے کی دعوت پر منعقد ہونے والے اس دورے کے دوران وہ رائے پور اور جگدل پور میں مختلف تاریخی اور ثقافتی تقاریب کا حصہ بنیں گی۔
وہ ہوائی اڈے سے سیدھے رائے پور میں واقع لوک بھون جائیں گی، جہاں دوپہر 12.45 بجے محترمہ ماتا ہاسی دیوی جی کے اعزاز میں 200 روپے کا خصوصی یادگاری سکہ اور ڈاک ٹکٹ جاری کریں گی۔ اس کے بعد شام چار بجے بڈھاپارا میں واقع بلبیر سنگھ جونیجا انڈور اسٹیڈیم میں نواکھائی تہوار پر منعقدہ ’سیوا سمان پرو‘ اور یوتھ بیداری پروگرام میں بطور مہمانِ خصوصی شرکت کریں گی، جس میں تقریباً چار ہزار نوجوانوں کے شریک ہونے کی امید ہے۔ اس تقریب میں گورنر رمن ڈیکا، وزیر اعلیٰ وشنو دیو سائے، کابینہ کے ارکان، اراکین پارلیمنٹ اور رائے پور شہر کے چاروں اراکین اسمبلی خاص طور پر موجود رہیں گے۔
صدر جمہوریہ دروپدی مرمو کل 23 اکتوبر کی صبح بستر (جگدل پور) پہنچیں گی۔ جگدل پور پہنچنے کے بعد صدر جمہوریہ سب سے پہلے صبح 11.00 بجے بستر کی عقیدت کا مرکز ماتا دنتیشوری مندر پہنچیں گی اور وہاں روایتی رسوم و رواج کے مطابق پوجا ارچنا کریں گی۔ اس کے بعد، دوپہر 12.45 بجے وہ بستر دسہرے کے سب سے اہم اور روایتی پروگرام ’موریا دربار‘ میں شرکت کے لیے سرہاسار بھون پہنچیں گی۔
موریا دربار کے ساتھ ہی وہ جگدل پور کے لال باغ میدان میں منعقدہ بڑے عوامی جلسے سے خطاب کریں گی اور مقامی قبائلی فن و ثقافت کا مشاہدہ کریں گی۔ وہ عالمی شہرت یافتہ بستر دسہرے کے تحت سرہاسار بھون میں منعقد ہونے والے روایتی اور تاریخی موریا دربار میں حصہ لیں گی۔ یہاں وہ بستر کی روایتی قبائلی قیادت (مانجھی-چالکی) اور مقامی عوامی نمائندوں سے براہِ راست بات چیت کریں گی، جو بستر کی قبائلی ثقافت کو قومی سطح پر ایک نئی شناخت دے گا۔ اس کے بعد وہ لال باغ میدان میں ایک بڑے عوامی جلسے سے بھی خطاب کریں گی۔
صدر جمہوریہ کی آمد کے پیشِ نظر رائے پور اور جگدل پور دونوں شہروں میں سیکورٹی کے سخت انتظامات کیے گئے ہیں اور انتظامیہ پوری طرح مستعد ہے۔ اس دورے کو چھتیس گڑھ، بالخصوص بستر کے علاقے کے لیے تاریخی وقار اور قبائلی تشخص کو مستحکم کرنے والا مانا جا رہا ہے۔
ہندوستھان سماچار
---------------
ہندوستان سماچار / انظر حسن
