لکھنؤ، 21 اکتوبر (ہ س)۔ سماج وادی پارٹی (ایس پی) کے قومی صدر اور اتر پردیش کے سابق وزیر اعلیٰ اکھلیش یادو نے بدھ کو بھارتیہ جنتا پارٹی (بی جے پی) پر انتخابات میں دھاندلی کرنے کا الزام لگایا۔ انہوں نے کہا کہ بی جے پی بے ایمانی اور بے ضابطگی کے بغیر انتخابات نہیں جیت سکتی۔ انہوں نے انتخابی کمیشن سے غیر جانبدارانہ کردار ادا کرنے کی اپیل کرتے ہوئے افسران کو سیاسی کارکنوں کی طرح کام کرنے سے گریز کرنے کا مشورہ دیا۔

لکھنؤ میں صحافیوں سے بات چیت کرتے ہوئے اکھلیش یادو نے الزام لگایا کہ بنیادی تعلیم کے افسر اور ضلع اسکول انسپکٹر جیسے عہدیدار لوگوں کو دھمکا رہے ہیں اور انتخابی بے ضابطگی میں ملوث ہیں۔ انہوں نے کہا کہ افسران کی ذمہ داری انتظامی عہدیداروں کے طور پر کام کرنا ہے، نہ کہ سیاسی کارکن بننا۔ ان کے مطابق سیاسی سرگرمیوں میں افسران کی شمولیت ان کے خلاف کارروائی اور انہیں جیل بھیجے جانے کی بنیاد بن سکتی ہے۔

ایس پی صدر نے ووٹر فہرست کے معاملے پر بھی سوال اٹھائے۔ انہوں نے پوچھا کہ بی جے پی رہنماؤں کے پاس ووٹر فہرست کیسے پہنچ رہی ہے اور حکومت کے وزرا کو یہ فہرست کہاں سے مل رہی ہے۔ انہوں نے دعویٰ کیا کہ مختلف مقامات پر وزرا کے وائس میسج بھیجے جا رہے ہیں۔ اکھلیش یادو نے انتخابی عمل کی غیر جانبداری یقینی بنانے کے لیے الیکشن کمیشن سے مداخلت کا مطالبہ کیا۔

سکشا متروں کے معاملے پر اکھلیش یادو نے کہا کہ بی جے پی حکومت نے سکشا متروں سے متعلق اسکیم کو ادھورا چھوڑ دیا ہے۔ انہوں نے کہا کہ سماج وادی پارٹی کی حکومت بننے پر سکشا متروںکو مکمل اساتذہ کا درجہ دے کر سرکاری ملازمت فراہم کی جائے گی۔ ایس پی صدر نے سابق وزیر اعظم خان کے ساتھ ناانصافی ہونے کا الزام لگاتے ہوئے کہا کہ ان کی پارٹی انہیں انصاف دلانے کے لیے مسلسل کوشش کرتی رہے گی۔

اکھلیش یادو نے دعویٰ کیا کہ وزیر اعلیٰ کی کرسی محفوظ نہیں ہے اور عوام اس بار بی جے پی سے اقتدار چھیننے جا رہے ہیں۔ انہوں نے کہا کہ کرسی بچانے کے لیے حکومت کچھ بھی کہہ سکتی ہے۔

ایل ڈی اے پر بدعنوانی کا الزام

اکھلیش یادو نے لکھنؤ ڈیولپمنٹ اتھارٹی (ایل ڈی اے) کو بدعنوانی کا اڈہ قرار دیتے ہوئے الزام لگایا کہ بی جے پی کے لوگوں نے اس محکمے کو بدعنوانی کا مرکز بنا دیا ہے اور وہاں پیسوں کا لین دین ہوتا ہے۔ انہوں نے کہا کہ ریزرویشن، حقوق اور عزت سماج وادی پارٹی ہی فراہم کرسکتی ہے۔ اس موقع پر ایس پی کے قومی ترجمان راجندر چودھری سمیت پارٹی کے دیگر رہنما اور عہدیدار بھی موجود تھے۔

ہندوستھان سماچار

ہندوستان سماچار / محمد شہزاد