وارانسی، 20 اکتوبر (ہ س)۔ وزیر اعظم نریندر مودی 25 اکتوبر کو بنارس کے نمو گھاٹ پر منعقد ہونے والے ہندوستانی فضائیہ کے شاندار ایئر شو میں مہمان خصوصی کے طور پر شرکت کریں گے۔ منگل کو بنارس میں فضائیہ کے دفتر میں منعقدہ پریس کانفرنس میں ایئر فورس کے ایئر وائس مارشل پی وی ایس نارائن، پولیس کمشنر موہت اگروال اور کمشنر ایس راج لنگم نے مشترکہ طور پر یہ اطلاع دی۔
انہوں نے بتایا کہ وارانسی میں 22، 24 اور 25 اکتوبر کو گنگا ندی کے اوپر ہونے والا یہ فضائی مظاہرہ یہاں کے لاکھوں لوگوں کے لیے ایک نادر نظارہ ہوگا۔ اس ایئر شو کو ’’ونگز اوور گینجز‘‘ کا نام دیا گیا ہے۔ اس فضائی مظاہرے میں کل 100 طیارے حصہ لیں گے، جن میں 52 لڑاکا طیارے، 15 ٹرانسپورٹ طیارے، 32 ہیلی کاپٹر اور ایک ورثے سے متعلق طیارہ شامل ہے۔ ان کے ساتھ ہندوستانی فضائیہ کی ’گروڑ‘ اسپیشل فورس بھی حصہ لے گی۔ یہ طیارے ملک بھر کے 12 فضائی اڈوں سے پرواز بھریں گے، جن میں چنئی کے قریب واقع بحری فضائی اڈہ ’اراکونم‘ بھی شامل ہے۔ یہ مظاہرہ فضائی و خلائی طاقت کی وسعت اور اس کی حکمت عملی کے تحت رسائی کو ظاہر کرے گا۔
انہوں نے کہا کہ وارانسی کے نمو گھاٹ پر منعقد ہونے والا ’ہندوستانی فضائیہ فضائی مظاہرہ 2026‘ ملک کے تئیں ہندوستانی فضائیہ کی 94 سالہ وقف خدمت کے اعتراف میں منعقد کیا جا رہا ہے۔ اس پروگرام میں گنگا ندی کے اوپر ہندوستانی فضائیہ کی فضائی و خلائی طاقت کا مظاہرہ کیا جائے گا۔ اس سے نوجوانوں کو ترغیب ملے گی اور قومی سلامتی کے تئیں ہندوستانی فضائیہ کے غیر متزلزل عزم کا اعادہ ہوگا۔ اس پروگرام کے لیے وارانسی میں گھاٹوں کے کنارے 11 سیکٹر بنائے گئے ہیں۔
انہوں نے بتایا کہ 25 اکتوبر کو ہونے والے ایئر شو میں وزیر اعظم نریندر مودی مہمان خصوصی ہوں گے۔ ملک کی دیگر اہم شخصیات کی بھی شرکت کا امکان ہے۔ اس فضائی مظاہرے میں طیاروں کی کل 25 فارمیشنز (طیاروں کے گروپ) حصہ لیں گی۔ ان فارمیشنز کی منصوبہ بندی انتہائی احتیاط سے کی گئی ہے، تاکہ ہندوستانی فضائیہ میں شامل مختلف اقسام کے طیاروں کی صلاحیتوں کو پیش کیا جا سکے۔ اس مظاہرے کا مقصد بہترین تال میل اور ہم آہنگی کے ساتھ فضائی کرتب دکھا کر طیاروں کی عملی صلاحیتوں اور فضائیہ کی پیشہ ورانہ مہارت کو اجاگر کرنا ہے۔
اس سال کے فلائی پاسٹ میں حصہ لینے والے طیاروں میں ہیلی کاپٹر، ٹرانسپورٹ طیارے اور لڑاکا طیارے شامل ہیں۔ ہیلی کاپٹروں کے بیڑے میں ایل سی ایچ، چنوک، ایل سی ایچ ایم کے تھری، ایل سی ایچ ایم کے فور، اپاچی، چیتک، کاموف-31 اور ایم آئی-17 وی 5 شامل ہوں گے۔
ٹرانسپورٹ طیاروں میں سی-295، سی-17، سی-130، اے ای ڈبلیو سی، آئی ایل-78، اے این-32 اور پی-8 آئی شامل ہوں گے۔ لڑاکا طیاروں کے بیڑے میں ایس یو-30 ایم کے آئی، میراج-2000، رافیل، ایل سی اے، مگ-29 اور جیگوار طیارے شامل ہوں گے۔
اس کے علاوہ ہارورڈ طیارہ اور ’سوریہ کرن‘ و ’سارنگ‘ کی مظاہرہ کرنے والی ٹیمیں بھی توجہ کا مرکز ہوں گی۔ اس پروگرام میں ہندوستانی فوج کے دو ایل سی ایچ ہیلی کاپٹر اور ہندوستانی بحریہ کا ایک پی-8 آئی طیارہ اور ایک کاموف-31 طیارہ بھی حصہ لیں گے۔
ہندوستھان سماچار
---------------
ہندوستان سماچار / عبدالواحد
